തിരുവല്ല: ഡിവൈഎഫ്ഐ പ്രവര്ത്തകര് ഉള്പ്പെട്ട ഗുണ്ടാ സംഘം വധിച്ച പെരിങ്ങര സിപിഎം എല്സി സെക്രട്ടറി പി.ബി.സന്ദീപ് കുമാറിന് ബിജെപിയുടെ ആദരാഞ്ജലി.സന്ദീപ് വധവുമായി ബന്ധപ്പെട്ട് സിപിഎം നടത്തുന്ന കുപ്രചാരണങ്ങള്ക്കെതിരെ ബിജെപി സംഘടിപ്പിച്ച രാഷ്ടീയ വിശദീകരണ യോഗത്തില് വച്ചാണ് ആദരാഞ്ജലി അര്പ്പിച്ചത്.
മുഖ്യപ്രഭാഷണം നടത്താനെത്തിയ സംസ്ഥാന വക്താവ് സന്ദീപ് വചസപ്തിയാണ് ആദരാഞ്ജലി അര്പ്പിക്കാമെന്ന് നിര്ദ്ദേശിച്ചത്. ഏത് രാഷ്ടീയ പാര്ട്ടിയില്പ്പെട്ടതായി ആയിക്കൊള്ളട്ടെ .കൊല്ലപ്പെട്ടത് ഒരു ചെറുപ്പക്കാരനാണെന്നാണ് പറഞ്ഞാണ് സന്ദീപിനെ സ്മരിക്കാമെന്ന് നിര്ദ്ദേശിച്ചത്.തുടര്ന്ന് ഒരുമിനിറ്റ് നേരം മൗനം ആചരിച്ച് സന്ദീപിനെ സ്മരിച്ചു. വേദിയിലും സദസ്സിലും ഉണ്ടായിരുന്നവര് എഴുന്നേറ്റ് നിന്ന് മൗനം ആചരിച്ചു.
സന്ദീപിന്റെ മരണം നടന്നിട്ട് ഒരാഴ്ച കഴിഞ്ഞിട്ടും സിപിഎം അനുസ്മരണ പരിപാടി പോലും സംഘടിപ്പിക്കാന് തയ്യാറായില്ല.അതേ സമയം ഇതിനെ രാഷ്ടീയ കൊലപാതകമാക്കി ചിത്രീകരിച്ച് നേട്ടം കൊയ്യാനാണ് ശ്രമിച്ചത്.എന്നാല് പ്രതികള് പോലീസില് നല്കിയ മൊഴിയിലും മാധ്യമങ്ങളോട് സംസാരിച്ചപ്പോഴും വ്യക്തി വൈരാഗ്യമാണ് കൊലപാതക കാരണമെന്ന് തറപ്പിച്ച് പറഞ്ഞിരുന്നു.
ഇതോടെ സിപിഎം പ്രചാരണത്തിന്റെ മുനയൊടിഞ്ഞു. പ്രതികള്ക്ക് സിപിഎം നേതൃത്വവുമായുള്ള ബന്ധവും പുറത്തായി. ഇപ്പോള് സന്ദീപ് വധത്തില് നിന്ന് എങ്ങനെയും തലയൂരാനുള്ള ശ്രമത്തിലാണ് നേതൃത്വം. ഇതിനിടെയിലാണ് ഇന്നലെ നടന്ന രാഷ്ടീയ വിശദീകരണ യോഗത്തില് സന്ദീപിനെ ബിജെപി സ്മരിച്ചത്.
