പനാജി: എഐസിസി ജനറല് സെക്രട്ടറി പ്രിയങ്ക വാദ്രയുടെ സന്ദര്ശന ദിവസം തന്നെ ഗോവ കോണ്ഗ്രസില് കൂട്ടരാജി. കോണ്ഗ്രസിന്റെ സ്വതന്ത്ര എംഎല്എ റോഹന് ഖുന്തെയുടെ പിന്തുണയുള്ള പോര്വോരിം മണ്ഡലത്തിലെ നേതാക്കളാണ് രാജിവച്ചത്. ഗോവ ഫോര്വേര്ഡ് പാര്ട്ടിയുമായി സഖ്യമുണ്ടാക്കുന്നതിനെച്ചൊല്ലിയാണ് കൂട്ടരാജി. 2022ലെ നിയമസഭാ തെരഞ്ഞെടുപ്പില് ഒരു താത്പര്യവുമില്ലാതെയാണ് കോണ്ഗ്രസ് മത്സരിക്കുന്നതെന്നും അവര് ആരോപിച്ചു. സഖ്യത്തിന്റെ സ്വഭാവം അടക്കമുള്ള കാര്യങ്ങളില് കോണ്ഗ്രസില് ഭിന്നതയുണ്ട്. ഗോവയിലെ കോണ്ഗ്രസ് നേതാക്കളുമായി ചര്ച്ച നടത്താന് ഇന്നലെ പ്രിയങ്ക എത്തിയിട്ടുണ്ട്.
ചില നേതാക്കളുടെ നിലപാടു കാരണം തെരഞ്ഞെടുപ്പ് പ്രവര്ത്തനം ആരംഭിക്കാന് പോലും കഴിഞ്ഞിട്ടില്ല. ജില്ലാ പഞ്ചായത്തംഗം ഗൂപേഷ് നായിക് പറഞ്ഞു. ഗൂപേഷ്, തെക്കന് ഗോവയില്നിന്നുള്ള മുതിര്ന്ന നേതാവ് മൊറിനോ റിബലോ എന്നിവര് രാജിവച്ചവരില് പെടുന്നു. നിരവധി പ്രാദേശിക നേതാക്കളും രാജിവച്ചിട്ടുണ്ട്.
കര്ട്ടോറിയം മണ്ഡലത്തിലെ നിലവിലെ എംഎല്എ അലക്സിയോ റജിനാള്ഡോയെ തന്നെ വീണ്ടും മത്സരിപ്പിക്കാന് തീരുമാനിച്ചതാണ് റിബലോയുടെ രാജിക്കു കാരണം. കഴിഞ്ഞ നാലര വര്ഷമായി യാതൊരു പാര്ട്ടി പ്രവര്ത്തനത്തിലും അലക്സിയോ പങ്കെടുത്തിട്ടില്ലെന്നും റിബലോ ചൂണ്ടിക്കാട്ടുന്നു. ഗോവയിലെ പാര്ട്ടി ഇന് ചാര്ജ് മുന് കേന്ദ്രമന്ത്രി പി. ചിദംബരമാണ്.
ഗോവ ഫോര്വേര്ഡ് പാര്ട്ടി, ബിജെപിയെ തോല്പ്പിക്കാന് വേണ്ടി കോണ്ഗ്രസിനെ സമീപിച്ച് പിന്തുണ അറിയിച്ചതാണെന്നും സഖ്യം സംബന്ധിച്ചുള്ള ധാരണകള് ഇപ്പോള് പുറത്തുവിടാനാവില്ലെന്നും ചിദംബരം പറയുന്നു.
