കാസര്കോഡ് : കാസര്കോട് മെഡിക്കല് കോളേജില് ഒപി ആരംഭിക്കാനിരിക്കേ ഡോക്ടര്മാര്ക്കും നേഴ്സുമാര്ക്കും കൂട്ട സ്ഥലംമാറ്റം. നവംബര് പതിനെട്ടിന് ഉക്കിനടുക്കയിലുള്ള കാസര്കോഡ് മെഡിക്കല് കോളേജില് സന്ദര്ശനം നടത്തിയപ്പോള് ഈ മാസം ആദ്യം ഒപി വിഭാഗം പ്രവര്ത്തനം തുടങ്ങുമെന്നായിരുന്നു ആരോഗ്യമന്ത്രി വീണ ജോര്ജ് അറിയിച്ചിരുന്നത്. എന്നാല് അതിനു പിന്നാലെ ഭൂരിഭാഗം ജീവനക്കാരും സ്ഥലം മാറ്റത്തില് ഉള്പ്പെട്ടിട്ടുണ്ട്
നവംബര് 27 നുള്ള ഉത്തരവിലാണ് പതിനൊന്ന് നഴ്സുമാരെ ഇടുക്കി മെഡിക്കല് കോളേജിലേക്ക് സ്ഥലം മാറ്റിയത്. വര്ക്കിങ് അറേജ്മെന്റ് എന്ന പേരിലാണ് കൂട്ടസ്ഥലം മാറ്റം. ഈ മാസം എട്ടിനുള്ള മറ്റൊരു ഉത്തരവില് രണ്ട് ഹെഡ്നേഴ്സുമാരെ ഉള്പ്പടെ 17 പേരെ കൊല്ലം മെഡിക്കല് കോളേജിലേക്ക് മാറ്റി.
രണ്ട് റേഡിയോ ഗ്രാഫര്മാര്, രണ്ട് ലാബ് ടെക്നീഷ്യന്മാര് എന്നിവര്ക്കും സ്ഥലം മാറ്റമുണ്ട്. ആറ് ഡോക്ടര്മാരേയും വിവിധ ഇടങ്ങളിലേക്ക് സ്ഥലം മാറ്റിയിട്ടുണ്ട്. ബാക്കിയുള്ള ഡോക്ടര്മാര്ക്ക് അടുത്ത ദിവസം തന്നെ ഉത്തരവ് ലഭിക്കുമെന്ന് അനൗദ്യോഗിക അറിയിപ്പും ലഭിച്ചു കഴിഞ്ഞു. ഇതോടെ മെഡിക്കല് കോളേജില് ജീവനക്കാരുടെ എണ്ണം കയ്യിലെണ്ണാവുന്നവര് മാത്രമായി ചുരുങ്ങി. ഇതോടെ മെഡിക്കല് കോളേജില് ഒപി തുടങ്ങുന്ന കാര്യം നീണ്ടുപോകുമെന്നാണ് ഉറപ്പാണ്.
