തിരുവല്ല : കൊല്ലപ്പെട്ട സിപിഎം ലോക്കല്‍ സെക്രട്ടറി പി.ബി. സന്ദീപ് കുമാറിന്റെ കഴുത്തില്‍ വെട്ടിയത് താനാണെന്ന് പ്രതികളില്‍ ഒരാളായ വിഷ്ണു കുമാര്‍. സന്ദീപ് മരിക്കുമെന്ന് കരുതിയില്ല. ജിഷ്ണുവും സന്ദീപും തമ്മില്‍ പ്രശ്‌നങ്ങള്‍ ഉണ്ടായിരുന്നു. കൈയ്യില്‍ കിട്ടിയപ്പോള്‍ വെട്ടിക്കൊലപ്പടുത്തിയതാണെന്നും റിപ്പോര്‍ട്ട്. വിഷ്ണുവിന്റെ ഫോണ്‍ സംഭാഷണം പുറത്തുവന്നതിലാണ് ഇക്കാര്യം പറയുന്നത്.
ആക്രമണം നടത്തിയ ശേഷം വീട്ടിലെത്തിയ വിഷ്ണു പെരിങ്ങരിയിലുള്ള സുഹൃത്തിനെയാണ് വിളിച്ചത്. കോണ്‍ഫറന്‍സ് കോളില്‍ തിരുവല്ലയിലുള്ള ഒരു സുഹൃത്തിനേയും ഉള്‍പ്പെടുത്തുകയായിരുന്നു. സന്ദീപിനെ ആക്രമിച്ചെങ്കിലും മരിക്കുമെന്ന് പ്രതീക്ഷിച്ചില്ല. ഇയാള്‍ കൊല്ലപ്പെട്ടെന്ന് അറിഞ്ഞിട്ടും യാതൊരു കുറ്റബോധവും തോന്നാത്ത വിധത്തിലാണ് വിഷ്ണുവിന്റെ ഫോണ്‍ സംഭാഷണം.
കൃത്യം നടത്തിയ ശേഷം അഞ്ചംഗ സംഘം മൂന്നായി തിരിഞ്ഞു. ഒന്നാം പ്രതി ജിഷ്ണു, പ്രമോദ്, നന്ദു എന്നിവര്‍ കരുവാറ്റയിലേക്കാണ് പോയത്. മുഹമ്മദ് ഫൈസല്‍ മറ്റൊരിടത്തേക്കും അഞ്ചാം പ്രതിയായ വിഷ്ണു കുമാര്‍ സ്വന്തം വീട്ടിലേക്കുമാണ് പോയത്. ജിഷ്ണുവും സന്ദീപുമായി മുന്‍പും പ്രശ്നങ്ങളുണ്ടായിരുന്നുവെന്നും കൈയില്‍ കിട്ടിയപ്പോള്‍ അങ്ങ് ചെയ്തുവെന്നും വിഷ്ണു സംഭാഷണത്തില്‍ പറയുന്നുണ്ട്. ഡമ്മി പ്രതികളെ അവതരിപ്പിക്കാനുള്ള നീക്കം നടന്നതായും സംഭാഷണത്തില്‍ പറയുന്നുണ്ട്.
പ്രതികളായ ജിഷ്ണു, നന്ദു, പ്രമോദ് എന്നിവര്‍ പോലീസില്‍ കീഴടങ്ങുമെന്നും എന്നാല്‍ താന്‍ കയറേണ്ടതില്ലെന്നാണ് നിര്‍ദ്ദേശമെന്നും വിഷ്ണു പറയുന്നു. അതേസമയം കൃത്യമായ ആസൂത്രണത്തോടെയാണ് കൊലപാതകം നടത്തിയതെന്നാണ് ഇതില്‍ നിന്നും വ്യക്തമാകുന്നത്. കൊലപാതകത്തിനുള്ള കാരണം വ്യക്തി വിരോധം തന്നെയാണെന്ന് ശരിവെയ്‌ക്കുന്നതാണ് ഈ സംഭാഷണങ്ങള്‍. എന്നാല്‍ സംഭാഷണത്തിന്റെ ആധികാരികത ഉറപ്പുവരുത്താന്‍ ശാസ്ത്രീയ പരിശോധന ഉള്‍പ്പെടെ നടത്തേണ്ടതുണ്ട്.
