ന്യൂദല്‍ഹി: തനിക്ക് യാതൊരു ഭയവുമില്ലെന്ന് ഇസ്ലാമിക് സ്റ്റേറ്റിന്റെ വധഭീഷണിയോട് പ്രതികരിച്ച് ബിജെപി നേതാവും ക്രിക്കറ്റ് താരവുമായ ഗൗതം ഗംഭീര്‍.
മൂന്ന് തവണയാണ് ഗൗതം ഗംഭീറിന് ഇസ്ലാമിക് സ്റ്റേറ്റ് കശ്മീരില്‍ നിന്നും വധഭീഷണിയുയര്‍ത്തുന്ന ഇ മെയില്‍ ലഭിച്ചത്. ദല്‍ഹി പൊലീസിന് പോലും താങ്കളെ സംരക്ഷിക്കാനാവില്ലെന്നായിരുന്നു ഇ-മെയിലില്‍ ഉണ്ടായിരുന്നത്.
‘എനിക്ക് ഇക്കാര്യത്തില്‍ യാതൊരു ഭയവുമില്ല. ഇന്‍റലിജന്‍സ് ബ്യൂറോ ഇത് സംബന്ധിച്ച് അന്വേഷണം തുടങ്ങിയിട്ടുണ്ട്. ഞാന്‍ എന്റെ ജോലികള്‍ തുടരുക തന്നെ ചെയ്യും. ഇതുപോലെയുള്ള പരിപാടികളില്‍ പങ്കെടുക്കുകയും ചെയ്യും.ഈ പരിപാടിയുടെ വിജയത്തിലാണ് എന്റെ ഇപ്പോഴത്തെ ശ്രദ്ധ’ – യമുന സ്‌പോര്‍ട്‌സ് കോംപ്ലക്‌സില്‍ നടക്കുന്ന ഈസ്റ്റ് ദല്‍ഹി പ്രിമിയര്‍ ലീഗിന്റെ ആദ്യ മത്സരം ഉദ്ഘാടനം ചെയ്ത ശേഷം സംസാരിക്കുകയായിരുന്നു ഗൗതം ഗംഭീര്‍.
കഴിഞ്ഞ ആഴ്ച ഗൗതം ഗംഭീറിന് മൂന്നാം തവണയും വധഭീഷണി ഉയര്‍ത്തി ഒരു ഇ മെയില്‍ ഐഎസ് ഐഎസ് കശ്മീരില്‍ നിന്നും ലഭിച്ചിരുന്നു. ദല്‍ഹി പൊലീസിന് പോലും സംരക്ഷിക്കാന്‍ കഴിയില്ലെന്ന ഭീഷണി ഉയര്‍ത്തുന്നതായിരുന്നു ഈ ഇമെയില്‍.
ഇതിന് മുന്‍പുള്ള രണ്ട് ഇ മെയിലുകള്‍ അയച്ച ഷാഹിദ് ഹമീദിനെ പൊലീസ് അറസ്റ്റ് ചെയ്തിരുന്നു. എന്നാല്‍ ഇതിന് ശേഷമായിരുന്നു മൂന്നാമത്തെ ഇ മെയില്‍.
