ന്യൂദല്ഹി: കൊവിഡ് പ്രതിരോധ വാക്സിന് കുത്തിവെപ്പിലും രാഷ്ട്രീയം പ്രകടമാക്കി കോണ്ഗ്രസും പ്രതിപക്ഷകക്ഷികളും ഭരിക്കുന്ന സംസ്ഥാനങ്ങള്. കോണ്ഗ്രസോ മറ്റുപാര്ട്ടികളോ ഭരിക്കുന്ന സംസ്ഥാനങ്ങളില് 90 ശതമാന ത്തിലധികം ആളുകള്ക്ക് ആദ്യ ഡോസ് വാക്സിന് പോലും നല്കിയിട്ടില്ല. 50 ശതമാനത്തിലധികം ആളുകള്ക്ക് മാത്രമേ രണ്ടാം ഡോസ് വാക്സിന് നല്കിയിട്ടുള്ളൂ.
ഒന്നും രണ്ടും ഡോസുകള് പോലും കൃത്യമായി വിതരണം ചെയ്യാന് കഴിയാത്ത ഈ സംസ്ഥാനങ്ങള് ഇപ്പോള് ബൂസ്റ്റര് ഡോസിന് വേണ്ടി ആവശ്യമുന്നയിക്കുകയാണ്. ജനങ്ങളുടെ കണ്ണില് പൊടിയിടുന്നതിനുവേണ്ടിയാണ് ഇത്തരം ആവശ്യങ്ങള് ഉന്നയിക്കുന്നത്. ഇന്ത്യ തദ്ദേശീയമായി കൊവിഡ് വാക്സിന് ഉല്പാദിപ്പിക്കുമെന്ന് പ്രഖ്യാപിച്ചപ്പോഴും നൂറു കോടി ആളുകള്ക്ക് വാക്സിന് നല്കിയെന്ന നേട്ടം കൈവരിച്ചപ്പോഴും അതിനെ ചെറുതാക്കി കാണിച്ചവരാണ് ഇപ്പോള് ബൂസ്റ്റര് ഡോസെന്ന ആവശ്യം ഉയര്ത്തുന്നത്.
കോണ്ഗ്രസ്സും സഖ്യകക്ഷികളും ഭരിക്കുന്ന സംസ്ഥാനങ്ങളില് ആദ്യ ഡോസ് തൊണ്ണൂറു ശതമാനവും സെക്കന്റ് ഡോസ് അന്പത് ശതമാനവു പോലുമായിട്ടില്ലെന്ന് കണക്കുകള് വ്യക്തമാക്കുന്നു. പഞ്ചാബില് ആദ്യ ഡോസ് 72.5%വും രണ്ടാം ഡോസ് 32.8%വുമാണ് പൂര്ത്തിയായത്. രാജസ്ഥാനില് ആദ്യ ഡോസ് 84.2%വും രണ്ടാം ഡോസ് 46.9%വുമാണ് പൂര്ത്തിയായത്. ഛത്തീസ്ഡഗില് ആദ്യ ഡോസ് 83.2%വും രണ്ടാംഡോസ് 47.2% വുമാണ് പൂര്ത്തിയായത്. മഹാരാഷ്ട്രയില് ആദ്യ ഡോസ് 80.11%വും രണ്ടാം ഡോസ് 42.5%വുമാണ് നല്കിയിരിക്കുന്നത്. തമിഴ്നാട്ടില് ആദ്യ ഡോസ് 78.1%വും രണ്ടാം ഡോസ് 42.65%വുമാണ് നല്കിയത്. തൃണമൂല് കോണ്ഗ്രസ് ഭരിക്കുന്ന പശ്ചിമബംഗാളില് ആദ്യ ഡോസ് 86.6%വും രണ്ടാം ഡോസ് 39.4%വുമാണ് പൂര്ത്തിയായിരിക്കുന്നത്.
എന്നാല് ബിജെപി ഭരിക്കുന്ന സംസ്ഥാനങ്ങള് പ്രതിരോധ കുത്തിവെപ്പിന്റെ കാര്യത്തിലും ബഹുദൂരം മുന്നിലാണ്. ഹിമാചല് പ്രദേശ്, ഗോവ എന്നീ സംസ്ഥാനങ്ങള് ഇതിനകം ആദ്യ ഡോസിന്റെ നൂറു ശതമാനം കവറേജ് നേടിക്കഴിഞ്ഞു. ഗുജറാത്ത്, ഉത്തരാഖണ്ഡ്, മധ്യപ്രദേശ്, കര്ണാടക, ഹരിയാന എന്നീ സംസ്ഥാനങ്ങള് തൊണ്ണൂറു ശതമാനത്തിന് മുകളിലും ആസ്സാം, ത്രിപുര എന്നീ സംസ്ഥാനങ്ങള് എണ്പത് ശതമാനത്തിലും മുകളിലും എത്തിക്കഴിഞ്ഞു. ഈ സംസ്ഥാനങ്ങളിലെല്ലാം രണ്ടാം ഡോസിന്റെ 50 ശതമാനം കവറേജില് എത്തി.
കോണ്ഗ്രസും സഖ്യകക്ഷികളും ഭരിക്കുന്ന സംസ്ഥാനങ്ങള്
(ആദ്യ ഡോസ്, രണ്ടാം ഡോസ്)
ജാര്ഖണ്ഡ് -66.2 %, 30.8 %
പഞ്ചാബ് -72.5 %, 32.8 %
രാജസ്ഥാന് -84.2 %, 46.9%
ഛത്തീസ്ഗഡ് -83.2%,47.2%
മഹാരാഷ്ട്ര -80.11%, 42.5 %
തമിഴ്നാട് -78.1%, 42.65%
പശ്ചിമബംഗാള് -86.6 %, 39.4 %
ബിജെപി ഭരിക്കുന്ന സംസ്ഥാനങ്ങള് ( ആദ്യ ഡോസ്, രണ്ടാം ഡോസ്)
ഹിമാചല്പ്രദേശ് -100 %, 91.9 %
ഗോവ -100 %, 87.9%
ഗുജറാത്ത് – 93.5 %, 70.3 %
ഉത്തരാഖണ്ഡ് -93.0 %, 61.7 %
മധ്യപ്രദേശ് -92.8 %, 62.9 %
കര്ണ്ണാടക –90.9%,59.1%
ഹരിയാന -90.04%,48.3%
അസം -88.9 %, 50 %
ത്രിപുര -80.5%,63.5%
