കൊച്ചി: കേരളത്തിലെ റോഡുകള്‍ കുണ്ടും കുഴികളുമായി തുടരുന്നതില്‍ രൂക്ഷ വിമര്‍ശനവുമായി ഹൈക്കോടതി. നന്നായി റോഡ് പണിയാന്‍ അറിയില്ലെങ്കില്‍ എഞ്ചിനീയര്‍മാര്‍ രാജിവച്ച് പോകണമെന്ന് ഹൈക്കോടതി വിമര്‍ശിച്ചു. കഴിവുള്ള ഒട്ടേറെ ആളുകള്‍ പുറത്ത് നില്‍ക്കുന്നുണ്ടെന്നും ജസ്റ്റിസ് ദേവന്‍ രാമചന്ദ്രന്‍ വ്യക്തമാക്കി. കൊച്ചിയിലെ റോഡുകളുടെ ശോചനീയാവസ്ഥ സംബന്ധിച്ച കേസിലാണ് ഹൈക്കോടതി പരാമര്‍ശം.റോഡുകള്‍ കൃത്യമായി നന്നാക്കിയില്ലെങ്കില്‍ ബന്ധപ്പെട്ട ഉദ്യോഗസ്ഥരെ പ്രതി ചേര്‍ക്കുമെന്ന് കോടതി കൂട്ടിച്ചേര്‍ത്തു.
സംസ്ഥാനത്തെ ഭൂരിഭാഗം റോഡുകളും തകര്‍ന്ന് വാഹനയാത്രക്കാരുടേയും കാല്‍നടയാത്രക്കാരുടേയും സുരക്ഷയ്‌ക്ക് വരെ ഭീഷണിയായ സാഹചര്യമാണ് നിലവിലുള്ളത്. നിരവധിപേരാണ് റോഡുകളില്‍ രൂപപ്പെട്ട കുഴികളില്‍ വീണ് അപകടത്തിലാവുന്നത്. റോഡും തോടും തമ്മില്‍ തിരിച്ചറിയാനാവാത്ത സാഹചര്യമാണ് നിലവിലുള്ളതെന്ന് പല കോണുകളില്‍ നിന്നും വിമര്‍ശനം ഉയര്‍ന്നതിന് പിന്നാലെയാണ് ഹൈക്കോടതിയുടെ രൂക്ഷ വിമര്‍ശനം.
റോഡുകള്‍ മികച്ചതായിരിക്കേണ്ടത് ജനങ്ങളുടെ സുരക്ഷയുടെ പ്രശ്‌നമാണ്. കഴിഞ്ഞ വര്‍ഷം കോടതി ഇടപെട്ട് നേരെയാക്കിയ റോഡുകള്‍ മാസങ്ങള്‍ക്കകം പഴയ പടിയായെന്ന് കോടതി ചൂണ്ടിക്കാണിച്ചു. രൂക്ഷ വിമര്‍ശനത്തിന് പിന്നാലെ റോഡുകള്‍ തകര്‍ന്നാല്‍ അടിയന്തരമായി നന്നാക്കാന്‍ സംവിധാനമില്ലെന്ന് കൊച്ചി നഗരസഭ കോടതിയില്‍ വ്യക്തമാക്കി. എന്നാല്‍ ഇത്തരം ന്യായീകരണങ്ങള്‍ മാറ്റി നിര്‍ത്തി, പുതിയ ആശയങ്ങള്‍ നടപ്പാക്കണമെന്ന് കോടതി നഗരസഭയ്‌ക്ക് നിര്‍ദ്ദേശം നല്‍കി. സംസ്ഥാനത്തെ റോഡ് അറ്റകുറ്റപ്പണികളുടെ വിശദാംശങ്ങള്‍ അറിയിക്കാന്‍ കോടതി നിര്‍ദേശം നല്‍കി.റോഡുമായി ബന്ധപ്പെട്ട വിവിധ വകുപ്പുകള്‍ക്കാണ് കോടതി നിര്‍ദേശം നല്‍കിയത്.
