അഗര്ത്തല: വ്യാജവാര്ത്ത നല്കിയതിന് അറസ്റ്റിലായ എച്ചഡബ്യൂ ന്യൂസ് നെറ്റ് വര്ക്ക് ജേര്ണലിസ്റ്റുകളായ സമൃദ്ധി ശകുനിയ, സ്വര്ണ ഝാ എന്നീ വനിതാ മാധ്യമപ്രവര്ത്തകര്ക്കെതിരേ കൂടുതല് തെളിവുകളുമായി ത്രിപുര പോലീസ്. വര്ഗീയ കലാപത്തിലേക്ക് വഴിവയ്ക്കാവുന്ന തരത്തില് വ്യാജ റിപ്പോര്ട്ടുകളാണ് ഇവര് പ്രസിദ്ധീകരിച്ചത്. ഒക്ടോബര് 26ന് ബംഗ്ലദേശില് ദുര്ഗ പൂജയ്ക്കിടെ ക്ഷേത്രങ്ങള്ക്ക് നേരെയുണ്ടായ അക്രമങ്ങളില് പ്രതിഷേധിച്ച് വിശ്വഹിന്ദു പരിഷത്ത് നടത്തിയ റാലിക്കിടെ ഉണ്ടായ ചെറിയ സംഘര്ഷത്തെ ഇവര് വക്രീകരിക്കുകയായിരുന്നു. ത്രിപുരയില് ഖുറാന് കത്തിച്ചെന്ന് അറസ്റ്റിലായ സുകന്യ റിപ്പോര്ട്ട് ചെയ്തിരുന്നു. എന്നാല് അന്വേഷണത്തില് അങ്ങനെ ഒന്ന് നടന്നതായി കണ്ടെത്താന് സാധിച്ചില്ല. തന്റെ പക്കലുണ്ടെന്ന് ഇവര് പറഞ്ഞ വീഡിയോ ഫൂട്ടേജ് ഹാജരാക്കാനും ഇവര്ക്ക് സാധിച്ചില്ല. ഇതോടെയാണ് കേസെടുക്കാന് പൊലീസ് തീരുമാനിച്ചത്. സമൃദ്ധിയാകട്ടെ ഗോമതി ജില്ലയിലെ കക്രബന് പ്രദേശത്തെ മുസ്ലിം പള്ളി തകര്ത്തെന്നായിരുന്നു റിപ്പോര്ട്ട് ചെയ്തത്. പോലീസ് നടത്തിയ അന്വേഷണത്തില് അത്തരത്തില് ഒരു സംഭവവും ഉണ്ടായിട്ടില്ല. കേട്ടറിഞ്ഞാണ് താന് അത്തരമൊരു വാര്ത്ത നല്കിയതെന്നായിരുന്നു സമൃദ്ധിയുടെ വാദം. ഇതേത്തുടര്ന്നാണ് അസം പൊലീസിന്റെ സഹായത്തോടെ ത്രിപുര പൊലീസ് ഇവരെ പിടികൂടിയത്.
അസമിലെ നീലം ബസാറില് നിന്നുമാണ് ഇവര് പിടിയിലായിത്. മതസ്പര്ധ വളര്ത്തല് ഉള്പ്പെടെയുള്ള വകുപ്പുകളാണ് ത്രിപുര പൊലീസ് ഇവര്ക്കെതിരെ ചുമത്തിയിരിക്കുന്നത്. വിശ്വ ഹിന്ദു പരിഷത്തി(വിഎച്ച്പി)ന്റെ പരാതിയിലാണ് നടപടി. ഡല്ഹിയിലേക്കു തിരച്ചുപോകാന് തയാറാകുമ്പോഴാണ് പൊലീസ് ഹോട്ടലിലെത്തുകയും ഇവരെ അവിടെതന്നെ കസ്റ്റഡിയിലാക്കുകയും ചെയ്തത്.
