ന്യൂദല്‍ഹി: ഭഗവാന്‍ ബിര്‍സ മുണ്ട സ്മാരക ഗാര്‍ഡന്‍ കം ഫ്രീഡം ഫൈറ്റേഴ്‌സ് മ്യൂസിയം പ്രധാനമന്ത്രി നരേന്ദ്ര മോദി നാളെ ഉദ്ഘാടനം ചെയ്യും. ഭഗവാന്‍ ബിര്‍സ മുണ്ടയുടെ ജന്മദിനം ജന്‍ജാതിയ ഗൗരവ് ദിവസായി ആഘോഷിക്കുമെന്ന് കേന്ദ്രസര്‍ക്കാര്‍ പ്രഖ്യാപിച്ചു. ഗൗരവ് ദിവസ് ആഘോഷത്തിന്റെ ഭാഗമായാണ് നാളെ റാഞ്ചിയിലെ മെമ്മോറിയല്‍ ഗാര്‍ഡന്‍ വീഡിയോ കോണ്‍ഫറന്‍സിംഗിലൂടെ നരേന്ദ്ര മോദി ഉദ്ഘാടനം ചെയ്യുക.
ഇന്ത്യന്‍ സ്വാതന്ത്ര്യ സമരത്തിലുള്‍പ്പെടെ ഗോത്ര സമൂഹങ്ങളുടെ അമൂല്യമായ സംഭാവനകളെ കുറിച്ച് മോദി സര്‍ക്കാര്‍ മുന്നേതന്നെ വ്യക്തമാക്കിയിട്ടുണ്ട്. 2016ലെ സ്വാതന്ത്ര്യദിന പ്രസംഗത്തില്‍, ഇന്ത്യയുടെ സ്വാതന്ത്ര്യസമരത്തില്‍ ഗോത്രവര്‍ഗ സ്വാതന്ത്ര്യ സമര സേനാനികള്‍ വഹിച്ച പങ്ക് ഊന്നിപ്പറയുകയും ധീരരായ ആദിവാസി സ്വാതന്ത്ര്യ സമര സേനാനികളുടെ സ്മരണയ്‌ക്കായി മ്യൂസിയങ്ങള്‍ നിര്‍മ്മിക്കുകയും ചെയ്യുമെന്ന് പ്രധാനമന്ത്രി പ്രഖ്യാപിച്ചിരുന്നു.
വരും തലമുറകള്‍ക്ക് ഗോത്ര സമൂഹങ്ങളുടെ ത്യാഗങ്ങളെക്കുറിച്ച് അറിയാന്‍ കഴിയുന്ന തരത്തിലേയ്‌ക്ക് സ്മാരകള്‍ നിര്‍മ്മിക്കുകയാണ് കേന്ദ്ര സര്‍ക്കാര്‍. ആദിവാസികാര്യ മന്ത്രാലയം ഇതുവരെ പത്ത് ആദിവാസി സ്വാതന്ത്ര്യ സമര മ്യൂസിയങ്ങള്‍ നിര്‍മ്മിക്കാന്‍ അനുമതി നല്‍കിയിട്ടുണ്ട്. വിവിധ സംസ്ഥാനങ്ങളില്‍ നിന്നും പ്രദേശങ്ങളില്‍ നിന്നുമുള്ള ആദിവാസി സ്വാതന്ത്ര്യ സമര സേനാനികളുടെ ഓര്‍മ്മകള്‍ ഈ മ്യൂസിയങ്ങള്‍ കാത്തുസൂക്ഷിക്കുമെന്നും സര്‍ക്കാര്‍ വ്യക്തമാക്കി.
ഭഗവാന്‍ ബിര്‍സ മുണ്ട തന്റെ ജീവന്‍ ബലിയര്‍പ്പിച്ച റാഞ്ചിയിലെ പഴയ സെന്‍ട്രല്‍ ജയിലാണ് ഭഗവാന്‍ ബിര്‍സ മുണ്ട മെമ്മോറിയല്‍ ഗാര്‍ഡന്‍ കം ഫ്രീഡം ഫൈറ്റേഴ്‌സ് മ്യൂസിയമായി മാറ്റിയെടുത്തത്. രാജ്യത്തിനും ആദിവാസി സമൂഹങ്ങള്‍ക്കും വേണ്ടിയുള്ള അദ്ദേഹത്തിന്റെ ത്യാഗത്തിന്റെ സമരണാര്‍ത്ഥമാണ് ജാര്‍ഖണ്ഡ് സംസ്ഥാന സര്‍ക്കാരുമായി സഹകരിച്ച് കേന്ദ്രം ഈ ഉദ്യമം നടപ്പാക്കിയത്.
ഗോത്രവര്‍ഗ സംസ്‌കാരവും ചരിത്രവും സംരക്ഷിക്കുന്നതിലും പ്രോത്സാഹിപ്പിക്കുന്നതിലും മ്യൂസിയം പ്രധാന പങ്ക്‌വഹിക്കും. തങ്ങളുടെ വനങ്ങള്‍, ഭൂമി അവകാശങ്ങള്‍, സംസ്‌കാരം എന്നിവ സംരക്ഷിക്കുന്നതിനായി ആദിവാസികള്‍ പോരാടിയ രീതിയും രാഷ്‌ട്രനിര്‍മ്മാണത്തിന് അത്യന്താപേക്ഷിതമായ അവരുടെ വീര്യവും ത്യാഗവും ഇത് പ്രകടിപ്പിക്കും. മ്യൂസിക്കല്‍ ഫൗണ്ടന്‍, ഫുഡ് കോര്‍ട്ട്, ചില്‍ഡ്രന്‍സ് പാര്‍ക്ക്, ഇന്‍ഫിനിറ്റി പൂള്‍, ഗാര്‍ഡന്‍, മറ്റ് വിനോദ സൗകര്യങ്ങള്‍ എന്നിവയെല്ലാം ഉള്‍ക്കൊള്ളുന്ന 25 ഏക്കറിലാണ് സ്മൃതി ഉദ്യാനം വികസിപ്പിച്ചിരിക്കുന്നത്. കേന്ദ്ര ഗോത്രവര്‍ഗ വകുപ്പ് മന്ത്രിയും ചടങ്ങില്‍ പങ്കെടുക്കും.
ഭഗവാന്‍ ബിര്‍സ മുണ്ടയ്‌ക്കൊപ്പം, രക്തസാക്ഷി ബുദ്ധു ഭഗത്, സിദ്ധുകന്‍ഹു, നിലമ്പര്‍പീതാംബര്‍, ദിവാകിസുന്‍, തെലങ്ക ഖാദിയ, ഗയാ മുണ്ട, ജത്ര ഭഗത്, പോട്ടോ എച്ച്, ഭഗീരഥ് തുടങ്ങിയ വ്യത്യസ്ത പ്രസ്ഥാനങ്ങളുമായി ബന്ധപ്പെട്ട മറ്റ് ആദിവാസി സ്വാതന്ത്ര്യ സമര സേനാനികളെയും മ്യൂസിയം ഉയര്‍ത്തിക്കാട്ടും. മാഞ്ചി, ഗംഗാ നാരായണ്‍ സിംഗ്. 25 അടി ഉയരമുള്ള ഭഗവാന്‍ ബിര്‍സ മുണ്ടയുടെ പ്രതിമയും 9 അടി ഉയരമുള്ള മറ്റ് സ്വാതന്ത്ര്യ സമര സേനാനികളുടെ പ്രതിമകളും മ്യൂസിയത്തിലുണ്ടാകും.
