തിരുവനന്തപുരം : സംസ്ഥാനത്ത് ഇന്ന് വീണ്ടും ശക്തമായ മഴയ്ക്ക് സാധ്യതയെന്ന് മുന്നറിയിപ്പ്. ബുധനാഴ്ച വൈകിട്ടോടെ കേരളത്തിലുണ്ടായ മഴയ്ക്ക് പുലര്ച്ചയോടെ ശമനമുണ്ടായിട്ടുണ്ട്. എന്നാല് ഇന്ന് ഉച്ചയ്ക്ക് ശേഷം മഴ വീണ്ടും ശക്തി പ്രാപിക്കാനാണ് സാധ്യത. സംസ്ഥാനമൊട്ടാകെ ഇടിമിന്നലോട് കൂടിയ ഒറ്റപ്പെട്ട ശക്തമായ മഴയ്ക്കും സാധ്യതയുണ്ട്. 40 കിമീ വരെ വേഗത്തില് കാറ്റ് വീശിയേക്കാം. അതിനാല് ജാഗ്രതാ നിര്ദ്ദേശം നല്കിയിട്ടുണ്ട്.
അതിതീവ്ര മഴ ദുരന്തം വിതച്ച കോട്ടയം, പത്തനംതിട്ട, ഇടുക്കി ജില്ലകളില് ഇന്ന് ഓറഞ്ച് അലര്ട്ട്. തിരുവനന്തപുരം, കൊല്ലം, എറണാകുളം, തൃശ്ശൂര്, മലപ്പുറം ജില്ലകളില് യെല്ലോ അലര്ട്ട് പ്രഖ്യാപിച്ചിപിച്ചിരിക്കുകയാണ്. മത്സ്യത്തൊഴിലാളികള് കടലില് പോകരുത്. കഴിഞ്ഞ ദിവസങ്ങളില് അതിതീവ്ര മഴ ലഭിച്ച പ്രദേശങ്ങളില് മണ്ണിടിച്ചിലും ഉരുള്പൊട്ടലിനും സാധ്യത കൂടുതലായതിനാല് അതീവ ജാഗ്രത വേണം. ചൊവ്വാഴ്ച തുലാവര്ഷം എത്തുന്നതിന് മുന്നോടിയായി കിഴക്കന് കാറ്റ് സജീവമായതും തെക്കന് തമിഴ്നാട് തീരത്ത് ചക്രവാതച്ചുഴി രൂപപ്പട്ടതുമാണ് മഴയ്ക്ക് കാരണം. മൂന്ന് ദിവസത്തോളം ചക്രവാതച്ചുഴി നിലനിന്നേക്കാം. ഞായറാഴ്ച വരെ മഴ തുടര്ന്നേക്കാമെന്നാണ് മുന്നറിയിപ്പ്.
പാലക്കാട് ജില്ലയില് കനത്ത മഴയില് രണ്ടിടത്ത് ഉരുള് പൊട്ടി. ആളപായമില്ല. അമ്പതോളം കുടുംബങ്ങളെ മാറ്റി പാര്പ്പിച്ചു. പുലര്ച്ചയോടെ മഴയ്ക്ക് ശമനമുണ്ട്. രാത്രിയില് പത്തനംതിട്ടയില് ഒറ്റപ്പെട്ട മഴ തുടര്ന്നു. ഇടുക്കി കല്ലാര് ഡാം തുറന്നു. വെളുപ്പിന് 2.30 മുതല് ഡാമിന്റെ രണ്ട് ഷട്ടറുകള് 10 സെന്റിമീറ്റര് വീതം ഉയര്ത്തി. കല്ലാര്, ചിന്നാര് പുഴകളുടെ കരകളിലുള്ളവര് അതീവ ജാഗ്രത പാലിക്കണമെന്നാണ് നിര്ദ്ദേശം.
മലപ്പുറം ജില്ലയില് രാത്രിയില് കാര്യമായ മഴ ഉണ്ടായില്ല. പുലര്ച്ചെ കാലാവസ്ഥ ശാന്തമാണ്. വയനാട്ടില് കനത്ത മഴയ്ക്ക് ശമനം. ജില്ലയില് എവിടെയും ഇപ്പോള് മഴയില്ല. വെള്ളക്കെട്ട് രൂപപ്പെട്ട ബത്തേരി, ചീരാല് എന്നിവിടങ്ങളില് നിന്ന് വെള്ളം ഇറങ്ങി. കോഴിക്കോട് നഗര മേഖലകളില് ബുധനാഴ്ച മുതല് മഴയില്ല. എന്നാല് മലയോര മേഖലകളില് നല്ല മഴ തുടരുന്നു.
കോട്ടയം ജില്ലയിലെ മലയോര മേഖലകളില് അടക്കം പുലര്ച്ചെ വരെ ശക്തമായ മഴ ഉണ്ടായിരുന്നു. കൂട്ടിക്കല് പഞ്ചായത്തിലെ ഉരുള്പൊട്ടല് സാധ്യതയുള്ള പ്രദേശങ്ങളില് ഇപ്പോഴും മഴ പെയ്യുന്നത് നേരിയ ആശങ്കയുണ്ടാക്കുന്നുണ്ട്. കഴിഞ്ഞ ദിവസത്തെ മഴയില് തീ കോയില് മണ്ണിടിച്ചിലുണ്ടായി. കാഞ്ഞിരപ്പള്ളി, മുണ്ടക്കയം ഭാഗത്ത് പുലര്ച്ചയോടെ മഴ കുറഞ്ഞു. ഉരുള് പൊട്ടലുണ്ടായ സ്ഥലങ്ങളില് രാത്രിയില് മഴ പെയ്തു. തൃശ്ശൂരില് രാത്രിയില് മഴ പെയ്തെങ്കിലും ചാലക്കുടിപ്പുഴയില് ജലനിരപ്പ് കാര്യമായി ഉയര്ന്നിട്ടില്ല. ജലനിരപ്പ് ഏഴു മീറ്റര് കടന്നാല് മാത്രമാണ് ചാലക്കുടിപ്പുഴയില് അപകട മുന്നറിയിപ്പ് നല്കുക. എന്നാല് ഇപ്പോള് മൂന്നര മീറ്റര് മാത്രമാണ് ജലനിരപ്പ്.
വയനാട് ജില്ലയില് കഴിഞ്ഞ ദിവസം വെള്ളക്കെട്ട് രൂപപ്പെട്ട ബത്തേരി ടൗണ്, ചീരാല് വെള്ളച്ചാല് കോളനി എന്നിവിടങ്ങളില് നിന്ന് വെള്ളം ഇറങ്ങി. പാമ്പുകുനി കോളനിയില് ഒഴുക്കില്പെട്ട് കാണാതായ 33 വയസുകാരന് വിനോദിനെ ഇതുവരെ കണ്ടെത്താനായിട്ടില്ല. ഫയര്ഫോഴ്സ് ഇയാള്ക്ക് വേണ്ടിയുള്ള തിരച്ചില് തുടരുകയാണ്. മേപ്പാടി, വൈത്തിരി, മാനന്തവാടി, ബത്തേരി, മുത്തങ്ങ മേഖലകളിലാണ് ബുധനാഴ്ച രാത്രി കനത്ത മഴ പെയ്തത്.
എന്നാല് ബാണാസുര ഡാമിന്റെ വൃഷ്ടി പ്രദേശങ്ങളില് മഴയുണ്ടായിരുന്നെങ്കിലും കൂടുതല് അളവില് പെയ്യാതിരുന്നത് ആശ്വാസമായി. ഡാമിലെ ജലനിരപ്പില് ആശങ്കപെടേണ്ട സാഹചര്യമില്ലെന്ന് അധികൃതര് വ്യക്തമാക്കി. വയനാട്ടില് പത്തിലേറെ ദുരിതാശ്വാസ ക്യാമ്പുകളിലായി അമ്പതോളം കുടുംബങ്ങളെയാണ് നിലവില് മാറ്റിപാര്പ്പിച്ചത്. ഉരുള് പൊട്ടല് ഭീഷണിയുള്ള മേഖലകളില് അതീവ ജാഗ്രതാ നിര്ദേശം നല്കിയിട്ടുണ്ട്. അടിയന്തര സാഹചര്യം നേരിടുന്നതിന് കണ്ണൂരില് നിന്നെത്തിയ 25 അംഗ കേന്ദ്രസേന 5 ദിവസമായി വയനാട്ടില് തുടരുകയാണ്.
