പഞ്ച്കുള: ദേരാ സച്ച സൗദ വിശ്വാസസംഘത്തിന്റെ ഗുരുവായ ഗുര്മീത് റാം റഹിം സിങിനും നാല് കൂട്ടാളികള്ക്കും മാനേജരുടെ കൊലപാതകത്തില് ജീവപരന്ത്യം തടവ് വിധിച്ച് സിബി ഐ കോടതി ഉത്തരവായി. ഇപ്പോള് റോഹ്ടക്കിലെ ജയിലില് ഒരു ബലാത്സംഗക്കേസില് ശിക്ഷ അനുഭവിച്ചുകൊണ്ടിരിക്കുകയാണ് ഗുര്മീത് റാം റഹിം സിങ്.
2002ലാണ് ദേര സിര്സയുടെ മാനേജര് രഞ്ജിത് സിംഗ് കൊല ചെയ്യപ്പെട്ടത്. ഇതിന് പിന്നില് ഗുര്മിത് റാം റഹിമും സംഘവുമാണെന്ന് കോടതിയ്ക്ക് ബോധ്യമായതിന്റെ അടിസ്ഥാനത്തിലാണ് ജീവപര്യന്തം തടവ് ശിക്ഷ വിധിച്ചത്. കേസില് റാം റഹിം സിങ്ങിന് 31 ലക്ഷവും ബാക്കി നാല് പേര്ക്ക് 50,000 രൂപ വീതവും പിഴയും ചുമത്തിയിട്ടുണ്ട്.
2002 ജൂലായ് 10നാണ് മാനേജര് രഞ്ജിത് സിങ് വെടിയേറ്റ് മരിച്ചത്. ദേരാ ആസ്ഥാനത്ത് സ്ത്രീകളെ ഗുര്മിത് റാം റഹിം സിങ് ദുരുപയോഗം ചെയ്യുന്നതായുള്ള വാര്ത്തയടങ്ങിയ അജ്ഞാത കത്ത് പ്രചരിപ്പിച്ചതിന് പിന്നില് മാനേജര് രഞ്ജിത് സിങാണെന്ന് വാര്ത്തയുണ്ടായിരുന്നു. ഇതേ തുടര്ന്നാണ് ഇദ്ദേഹത്തെ വധിച്ചത്.
2017ല് ശിഷ്യകളായ രണ്ട് യുവതികളെ പീഢിപ്പിച്ച കേസില് ഗുര്മിത് റാം റഹിം സിങിനെ 20 വര്ഷത്തെ തടവ് ശിക്ഷ വിധിച്ചിരുന്നു. ഇദ്ദേഹമിപ്പോള് റോഹ്ടകില് സുനാറിയ ജയിലില് കഴിയുകയാണ്. പിന്നീട് പത്രപ്രവര്ത്തകന് റാം ചന്ദര് ചത്രപതിയെ കൊന്ന കേസിലും ജീവപര്യന്തം ശിക്ഷയും വിധിച്ചിട്ടുണ്ട്.
