ഡെറാഡൂണ്‍ : ഉത്തരാഖണ്ഡ് കോണ്‍ഗ്രസ് നേതൃത്വത്തിന് തിരിച്ചടി. പുരോള നിയോജകമണ്ഡലം എംഎല്‍എ രാജ്കുമാര്‍ ബിജെപിയില്‍ ചേര്‍ന്നു. ഇന്ന് ദല്‍ഹിയില്‍ നടക്കുന്ന പരിപാടിയിലാണ് രാജ്കുമാര്‍ ബിജെപി അംഗത്വം സ്വീകരിച്ചത്.
കേന്ദ്രമന്ത്രി ധര്‍മ്മേന്ദ്ര പ്രധാന്‍ ഉത്തരാഖണ്ഡ് മുഖ്യമന്ത്രി പുഷ്‌കര്‍ സിങ് ധാമി, സംസ്ഥാന പ്രസിഡന്റ് മദന്‍ കൗശിക് ഉള്‍പ്പടെയുള്ള മുതിര്‍ന്ന നേതാക്കള്‍ ചടങ്ങില്‍ പങ്കെടുത്തു. നേരത്തെ ബിജെപി പ്രവര്‍ത്തകനായിരുന്ന രാജ്കുമാര്‍ 2017 ലാണ് കോണ്‍ഗ്രസില്‍ ചേര്‍ന്നത്.
കഴിഞ്ഞ കുറച്ച് ദിവസങ്ങളായി രാജ്കുമാര്‍ ബിജെപിക്കായി പ്രവര്‍ത്തിച്ചുവരികയായിരുന്നു. നിലവില്‍ ഉത്തരാഖണ്ഡില്‍ ബിജെപി ഭരണമാണ്. അടുത്ത വര്‍ഷം നിയമസഭാ തെരഞ്ഞെടുപ്പ് നടക്കേണ്ടുന്ന സംസ്ഥാനങ്ങളില്‍ ഒന്നാണ് ഉത്തരാഖണ്ഡ്.
