തിരുവനന്തപുരം: നടി ദേവി അജിത്തിന്റെ മകള്‍ വിവാഹിതയായി. നന്നു എന്ന് വിളിക്കുന്ന നന്ദനയുടെ വിവാഹം തിരുവനന്തപുരം സ്വദേശി സിദ്ധാര്‍ത്ഥുമായി നടന്നു. തിരുവനന്തപുരം ഉദിയന്നൂര്‍ ദേവീ ക്ഷേത്രത്തില്‍ വെച്ചായിരുന്നു വിവാഹം. അടുത്ത സുഹൃത്തുക്കളും ബന്ധുക്കളും മാത്രം പങ്കെടുത്ത സ്വകാര്യച്ചടങ്ങിലായിരുന്നു വിവാഹം.
ചെന്നൈയില്‍ ബ്രാന്‍ഡ് അനലിസ്റ്റായി ജോലി ചെയ്യുകയാണ് നന്ദന. സ്‌കൂളില്‍ വെച്ചേ ചങ്ങാതിയായിരുന്നു വരനായ സിദ്ധാര്‍ത്ഥ്. സിദ്ധാര്‍ത്ഥിന്റെ അച്ഛന്‍ ഹരി ശാസ്തമംഗലം കൗണ്‍സിലറായിരുന്നു. കണ്‍സ്ട്രക്ഷന്‍ ബിസിനസ്സുമുണ്ടായിരുന്നു. ലണ്ടനില്‍ ഫിലിംമേക്കിംഗ് പഠിച്ച സിദ്ധാര്‍ത്ഥ് അച്ഛന്റെ മരണ ശേഷം കണ്‍സ്ട്രക്ഷന്‍ ബിസിനസ്സിലേക്ക് തിരിഞ്ഞു.
ദേവി അജിത്തിന്റെ ഭര്‍ത്താവ് അജി മകള്‍ക്ക് നാല് വയസ്സുള്ളപ്പോള്‍ മരിച്ചു. പിന്നീട് ദേവി അജിത്തും അവരുടെ അച്ഛനും അമ്മയും ചേര്‍ന്നാണ് നന്ദനയെ വളര്‍ത്തിയത്.
ടി സുനാമി എന്ന ചിത്രത്തിലാണ് ദേവി അജിത്ത് ഒടുവില്‍ വേഷമിട്ടത്. ജാലിയന്‍ വാലാ ബാഗ്, ഒരു വയനാടന്‍ കഥ, സായാഹ്ന വാര്‍ത്തകള്‍, ചില നേരങ്ങളില്‍ ചിലര്‍, പെര്‍ഫ്യൂം, നാന്‍സി റാണി, വാക്ക് എന്നിവയാണ് ദേവി അജിത്തിന്റെ പുതിയ ചിത്രങ്ങള്‍.
