അമ്പലപ്പുഴ: ജാതിപ്പേര് പറഞ്ഞ് യുവതിയെ ആക്ഷേപിച്ച കേസില്‍ സിപിഎമ്മുകാരനായ ഗ്രാമ പഞ്ചായത്തംഗത്തിനെതിരെ ജാമ്യമില്ലാ വകുപ്പു ചുമത്തി പോലീസ് കേസെടുത്തു. അമ്പലപ്പുഴ തെക്ക് ഗ്രാമ പഞ്ചായത്ത് എട്ടാം വാര്‍ഡംഗം അജീഷിനെതിരെയാണ് അമ്പലപ്പുഴ പോലീസ് കേസെടുത്തത്. കഴിഞ്ഞ 29നാണ് ആമയിട സ്വദേശിനിയായ പട്ടികജാതി വിഭാഗത്തില്‍പ്പെട്ട യുവതി പഞ്ചായത്തംഗത്തിനെതിരെ അമ്പലപ്പുഴ പോലീസില്‍ പരാതി നല്‍കിയത്. വാടകക്ക് താമസിക്കുന്ന തന്നെ ജാതിപ്പേര് പറഞ്ഞ് ആക്ഷേപിക്കുകയും കൈയേറ്റം ചെയ്യാന്‍ ശ്രമിക്കുകയും ചെയ്തുവെന്ന് കാട്ടിയാണ് പരാതി നല്‍കിയത്.
എന്നാല്‍ പരാതി സ്വീകരിച്ച പോലീസ് തുടക്കം മുതല്‍ തന്നെ കേസെടുക്കാതെ ഒത്തുതീര്‍പ്പ് ശ്രമം നടത്തുകയായിരുന്നു. പഞ്ചായത്തംഗത്തെ സംരക്ഷിക്കാന്‍ സിപിഎം നേതാക്കള്‍ ഇടപെട്ടതോടെയാണ് പോലീസ് കേസെടുക്കാതിരുന്നത്. ഇതിനിടെ പാര്‍ട്ടി ഓഫീസില്‍ വെച്ച് സിപിഎം നേതാക്കളും ജനപ്രതിനിധികളും ഇടപെട്ട് യുവതിയെ വിളിച്ചു വരുത്തി ഒത്തു തീര്‍പ്പ് ശ്രമം നടത്തിയെങ്കിലും പരാജയപ്പെട്ടു. ഇതിനു ശേഷം പോലീസ് സ്റ്റേഷനില്‍ വെച്ച് ഒത്തുതീര്‍പ്പിന് ശ്രമം നടത്തിയെങ്കിലും അജീഷ് എത്താതിരുന്നതിനാല്‍ ഈ ശ്രമവും പാളി. തന്റെ മൊഴി രേഖപ്പെടുത്തി ഒരാഴ്ച പിന്നിട്ടിട്ടും കേസെടുക്കാതെ വന്നതിനെത്തുടര്‍ന്ന് യുവതി മൂന്നു ദിവസം മുന്‍പ് ജില്ലാ പോലീസ് മേധാവിക്ക് പരാതി നല്‍കി.
ഇതിന് ശേഷവും അമ്പലപ്പുഴ പോലീസ് കേസെടുക്കാതെ വന്നതോടെ ഇന്നലെ യുവതി കോടതിയെ സമീപിക്കാനൊരുങ്ങി. തൊട്ടുപിന്നാലെ പട്ടികജാതി സംഘടനകളും കൂടി ഇടപെട്ടതോടെയാണ് ഗത്യന്തരമില്ലാതെ പോലീസ് കേസെടുത്തത്.പഞ്ചായത്തംഗത്തിനെതിരെ ഒരാഴ്ച പിന്നിട്ടിട്ടും കേസെടുക്കാതിരുന്ന അമ്പലപ്പുഴ പോലീസിന്റെ നിലപാട് വലിയ വിമര്‍ശനങ്ങള്‍ക്കും കാരണമായിട്ടുണ്ട്.
