തൃശൂര്‍: തൃശൂര്‍ മെഡിക്കല്‍ കോളജിലെ 30 എംബിബിഎസ് വിദ്യാര്‍ഥികള്‍ക്ക് കോവിഡ് സ്ഥിരീകരിച്ചു. ആശുപത്രിയില്‍ ഡ്യൂട്ടി ചെയ്തിരുന്നവരിലാണ് വൈറസ് സാന്നിധ്യം കണ്ടെത്തിയത്. ആശുപത്രി വളപ്പിലെ 13 ഇന്ത്യന്‍ കോഫി ഹൗസ് ജീവനക്കാര്‍ക്കും രോഗബാധ. രണ്ടു ബാച്ചുകളിലുള്ള 30 വിദ്യാര്‍ഥികള്‍ക്കാണ് കോവിഡ്. തുടര്‍ന്ന് രണ്ടു ബാച്ചുകള്‍ക്കും അവധി നല്‍കി. ഹോസ്റ്റല്‍ അടയ്‌ക്കണമോയെന്ന കാര്യത്തില്‍ ഉടന്‍തന്നെ തീരുമാനമെടുക്കും. കോവിഡ് ബാധിച്ച വിദ്യാര്‍ഥികള്‍ കഴിഞ്ഞ ദിവസങ്ങളില്‍ ആശുപത്രി ഡ്യൂട്ടിയിലുണ്ടായിരുന്നത് വലിയ ആശങ്കയ്‌ക്ക് ഇടയാക്കുന്നുണ്ട്.
പലരോഗികളുമായും ഇവര്‍ക്ക് സമ്പര്‍ക്കമുണ്ടായിട്ടുണ്ട്. ആശുപത്രി വളപ്പിലെ ഇന്ത്യന്‍ കോഫി ഹൗസില്‍ കഴിഞ്ഞദിവസം ഒരാള്‍ കോവിഡ് ബാധിച്ച് മരിച്ചിരുന്നു. തുടര്‍ന്ന് നടത്തിയ പരിശോധനയിലാണ് 13 ജീവനക്കാര്‍ക്ക് കോവിഡ് പിടിപെട്ടുവെന്ന് കണ്ടെത്തിയത്. ഇത്രയും പേര്‍ രോഗബാധിതരായതോടെ കോഫി ഹൗസ് അടച്ചു.
