കല്‍പ്പറ്റ: വയനാട്ടുകാര്‍ ഒറ്റ ദിവസം കൊണ്ട് കുടിച്ചു തീര്‍ത്തത് 1 കോടി 30 ലക്ഷത്തിലധികം രൂപയുടെ മദ്യം. ഇതാകട്ടെ സര്‍ക്കാരിന്റെ ഔട്ട് ലെറ്റില്‍ നിന്നുള്ള കണക്ക്. ബാറുകളിലേതു കൂടി കൂട്ടിയാല്‍ വില്‍പ്പന രണ്ട് കോടിക്ക് മീതെ വരും.
ഏറ്റവും കൂടുതല്‍ വില്‍പ്പന നടന്നത് മാനന്തവാടിയിലാണ്. നാല്‍പത് ദിവസത്തെ അടച്ചിടലിന് ശേഷം ബാറും ബിവറേജസ് ഔട്ട്‌ലെറ്റുകളും തുറന്നപ്പോള്‍ കച്ചവടം പൊടിപൊടിച്ചു. രാവിലെ മുതല്‍ തന്നെ നീണ്ട നിരതന്നെയാണ് എല്ലാ കേന്ദ്രങ്ങളിലും അനുഭവപ്പെട്ടത്. നാല്‍പത് ദിവസത്തെ അടച്ചിടല്‍ സമയത്ത് നാട്ടിലെങ്ങും നാടന്‍ ചാരായത്തിന്റെയും കര്‍ണാടക മദ്യത്തിന്റെയും ഒഴുക്കായിരുന്നു. അതിനിടയിലാണ് മദ്യവില്‍പ്പന തുടങ്ങിയത്.
ബീവറേജിന് പുറമെ ജില്ലയിലെ 9 ബാറുകളിലും തരക്കേടില്ലാത്ത കച്ചവടം നടന്നിട്ടുണ്ട്. അങ്ങനെ കണക്ക് കൂട്ടിയാല്‍ ഏതാണ്ട് രണ്ട് രണ്ടര കോടിയുടെ മദ്യം ഇന്നലെ മാത്രം വിറ്റു തീര്‍ന്നിട്ടുണ്ട്. ഏറ്റവും കൂടുതല്‍ വില്‍പ്പന നടന്നത് മാനന്തവാടിയിലാണ് ഇവിടെ 30 ലക്ഷം രൂപയുടെ കച്ചവടമാണ് നടന്നത്. മറ്റ് ഔട്ട്‌ലെറ്റുകളില്‍ 20 ലക്ഷത്തിലധികം രൂപയുടെ കച്ചവടം നടന്നതായാണ് അറിഞ്ഞത്.
ബാറുകളിലും സമാനമായ കച്ചവടം നടന്നിട്ടുണ്ട് കാരണം ബിവറേജസ് ഔട്ട്‌ലെറ്റിലെ അതെ വിലയ്‌ക്ക് തന്നെയാണ് ബാറുകളിലും മദ്യം ലഭിക്കുന്നത.് അതുകൊണ്ട് തന്നെ കച്ചവടവും നടന്നിട്ടുണ്ട്. മദ്യം വിറ്റതിന്റെ കണക്ക് വെച്ച് നോക്കുമ്പോള്‍ കൊറോണയും ലോക്ക് ഡൗണുമൊന്നും വയനാട്ടിലെ കുടിയന്‍മാരെ ബാധിച്ചില്ലന്ന് സാരം.
