ന്യൂദല്‍ഹി: രാജ്യത്ത് തുടര്‍ച്ചയായി കോവിഡ് രോഗബാധിതരുടെ എണ്ണത്തില്‍ വലിയ കുറവ്. കഴിഞ്ഞ 24 മണിക്കൂറിനുള്ളില്‍ 60,753 പുതിയ കോവിഡ് കേസുകളാണ് റിപ്പോര്‍ട്ട് ചെയ്തത്. 1,647 മരണങ്ങളുമുണ്ടായി. രോഗബാധയും മരണവും ദിനംപ്രതി കുറയുന്നുവെന്ന് ആരോഗ്യ, കുടുംബക്ഷേമ മന്ത്രാലയത്തിന്റെ ഏറ്റവും പുതിയ ബുള്ളറ്റിന്‍ പറയുന്നു.
97,743 പേര്‍ രോഗമുക്തി നേടി. ഇന്ത്യയിലെ മൊത്തം രോഗമുക്തി നേടിയവരുടെ എണ്ണം 2,86,78,390 ആയി. ഇന്ത്യയിലെ കോവിഡ് -19 മരണസംഖ്യ 3,85,137 ആയി. രാജ്യത്തെ മൊത്തം കോവിഡ് ബാധിച്ചവര്‍ 2,98,23,546 ആണ്. രാജ്യത്ത് നിലവില്‍ 7,60,019 കേസുകള്‍ സജീവമാണെന്ന് ആരോഗ്യ മന്ത്രാലയം അറിയിച്ചു.
അതേസമയം, ജൂണ്‍ 17 വരെ കോവിഡ് -19 നായി 38,92,07,637 സാമ്പിളുകള്‍ പരിശോധിച്ചതായി ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് (ഐസിഎംആര്‍) അറിയിച്ചു. . രാജ്യത്ത് ഇതുവരെ 27,23,88,783 വാക്‌സിന്‍ ഡോസുകള്‍ നല്‍കി.
