ലഖ്‌നൗ: ഉത്തര്‍ പ്രദേശിനെതിരെയും രാമക്ഷേത്രത്തിനെതിരെയും വ്യാജപ്രചരണം നടത്തുന്ന വയനാട് എംപിക്കെതിരെ രൂക്ഷ വിമര്‍ശനവുമായി യുപി മുഖ്യമന്ത്രി യോഗി ആദിത്യനാഥ്. ശ്രീരാമന്റെ ആദ്യ പാഠമെങ്കിലും രാഹുല്‍ ഗാന്ധി പഠിക്കണം. സത്യം പറയുന്നതാണ് നിങ്ങള്‍ ജീവിതത്തില്‍ ഒരിക്കലും ചെയ്യാത്ത കാര്യം. രാമക്ഷേത്രത്തെക്കുറിച്ചുള്ള സത്യങ്ങള്‍ പുറത്തുവന്നിട്ടും നിങ്ങള്‍ സമൂഹത്തില്‍ വിഷം കലക്കാന്‍ ശ്രമിക്കുകയാണ്. അധികാരത്തിന്റെ ആര്‍ത്തിമൂത്ത് രാജ്യത്തെ തന്നെ അപമാനിക്കുകയാണ്. ഉത്തര്‍ പ്രദേശിനെ അപമാനിക്കുന്നത് രാഹുല്‍ നിര്‍ത്തണമെന്നും യോഗി ആവശ്യപ്പെട്ടു.
അയോധ്യയില്‍ രാമക്ഷേത്ര ഭൂമിയിടപാടില്‍ അഴിമതി നടന്നുവെന്നുള്ള വ്യാജപ്രചരണം രാഹുല്‍ നടത്തിയിരുന്നു. ഇതിനുള്ള മറുപടിയാണ് യോഗി നല്‍കിയത്. അയോധ്യ രാമക്ഷേത്ര ഭൂമിയിടപാടില്‍ അഴിമതി ആരോപണം തള്ളി ക്ഷേത്ര ട്രസ്റ്റ് രംഗത്തെത്തിയിരുന്നു. ഭൂമിയിടപാട് നടന്നത് സുതാര്യവും നടപടിക്രമങ്ങള്‍ പാലിച്ചുമാണെന്ന് അയോധ്യ ക്ഷേത്ര ട്രസ്റ്റ് സെക്രട്ടറി ചമ്പത് റായി വ്യക്തമാക്കി. ബാങ്ക് അക്കൗണ്ട് വഴിയാണ് പണം കൈമാറിയതെന്നും എല്ലാ നടപടിക്രമങ്ങളും ഇക്കാര്യത്തില്‍ പാലിച്ചിട്ടുണ്ടെന്നും അദ്ദേഹം ട്വീറ്റ് ചെയ്തു.
