വടകര: തപാല്‍ വകുപ്പിന്റെ സമ്പാദ്യ പദ്ധതിയുടെ മറവില്‍ സിപിഎം പ്രവർത്തക തട്ടിയെടുത്തത് ലക്ഷങ്ങൾ. മണിയൂരിലെ ഏജന്റ് പി.ശാന്തയാണ് എളമ്പിലാട്, മുതുവന, കുറുന്തോടി, കുന്നത്തുകര പ്രദേശങ്ങളിലെ നൂറിലധികം വീട്ടമ്മമാരുടെ പണമാണ് തട്ടിയത്.
അഞ്ച് വര്‍ഷത്തേക്കുള്ള മൂന്ന് ലക്ഷം രൂപ വരെ നിക്ഷേപം വരുന്ന പദ്ധതികളിലാണ് തട്ടിപ്പെന്ന് പറയുന്നു. പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്തു അന്വേഷണം തുടങ്ങിയതായി പയ്യോളി പോലീസ് വ്യക്തമാക്കി. മാസംതോറും വീടുകളില്‍ നിന്ന് പണം ശേഖരിക്കുന്നത് കാര്‍ഡില്‍ രേഖപ്പെടുത്തി നല്‍കുന്നുണ്ടെങ്കിലും തുക വടകര ഹെഡ് പോസ്റ്റ് ഓഫീസില്‍ അടച്ചിട്ടില്ലന്ന് നിക്ഷേപകരുടെ അന്വേഷണത്തില്‍ വ്യക്തമായി. മൂന്ന് ലക്ഷം രൂപ നിക്ഷേപിച്ച കുറുന്തോടി സ്വദേശിയായ വീട്ടമ്മയുടെ പേരില്‍ അടച്ചത് 10000 രൂപ മാത്രമാണ്.
പാസ് ബുക്കിലെ യഥാര്‍ത്ഥ പേര് വെട്ടിമാറ്റി വ്യാജ പാസ് ബുക്ക് നല്‍കി മറ്റൊരാളുടെ മൂന്ന് ലക്ഷം രൂപയും തട്ടിച്ചതായി ആക്ഷേപമുണ്ട്. 2015 ല്‍ തുടങ്ങിയ നിക്ഷേപത്തിന്റെ കാലാവധി 2020 സെപ്തംബറില്‍ അവസാനിച്ചെങ്കിലും തുക തിരിച്ചു നല്‍കാതെ നീട്ടിക്കൊണ്ടുപോവുകയായിരുന്നു.
സി.പി.എം പ്രവര്‍ത്തകയായ ഏജന്റിന് നിയമനം ലഭിച്ചത് തോടന്നൂര്‍ ബ്ലോക്ക് പഞ്ചായത്ത് വഴിയാണ്. തട്ടിപ്പിനിരയായ നിരവധി പേര് പരാതിയുമായി ബ്ലോക്ക് ഓഫീസിലും എത്തിയിട്ടുണ്ട്. സിപിഎം പ്രാദേശിക നേതൃത്വം സംഭവത്തില്‍ ഇടപെട്ടിരുന്നെകിലും ഏതാണ്ട് 40 ലക്ഷം രൂപയുടെ ബാധ്യത ഉണ്ടെന്നറിഞ്ഞതോടെ പിന്മാറുകയായിരുന്നുവെന്ന് പരാതിക്കാരില്‍ ചിലര്‍ പറയുന്നു.
