പാലക്കാട്: എന്ഡിഎ സ്ഥാനാര്ത്ഥിയുടെ കാല്തൊട്ട് വന്ദിക്കുന്ന പ്രധാനമന്ത്രി നരേന്ദ്രമോദിയുടെ വീഡിയോ വൈറലാകുന്നു.
ചൊവ്വാഴ്ച പാലക്കാട് കോട്ടമൈതാനത്ത് നടന്ന ചടങ്ങില് ജില്ലയിലെ സ്ഥാനാര്ത്ഥികളെ പൊതുവേദിയില് ആദരിക്കുന്നതിനിടയിലാണ് എന്ഡിഎ സ്ഥാനാര്ത്ഥി പി.നസീമയുടെ കാല്തൊട്ട് മോദി ആദരിച്ചത്. ഇത് കണ്ട സദസ്സ് അവിശ്വസനീയതയോടെ, തെല്ല് അമ്പരപ്പോടെ ഒരു നിമിഷം നിശ്ശബ്ദമായി…അടുത്ത നിമിഷം നിര്ത്താത്ത, കൂടുതല് കനപ്പെട്ട കരഘോഷത്തിന് ആ നിശ്ശബ്ദത വഴിമാറി.
ഓരോരുത്തരെയായി മോദി ആദരിയ്ക്കുന്നതിനിടയിലാണ് നസീമയുടെ അരികിലെത്തിയത്. നസീമ മോദിയുടെ കാല്തൊട്ട് വന്ദിക്കാന് തുടങ്ങുമ്പോള് തന്നെ, പ്രധാനമന്ത്രി തിരിച്ച് നസീമയുടെ കാല് തൊട്ട് വന്ദിക്കുകയായിരുന്നു. എന്ഡിഎയ്ക്ക് വേണ്ടി ഈ തെരഞ്ഞെടുപ്പില് മത്സരിക്കുന്ന ഏക വനിതാ മുസ്ലിം സ്ഥാനാര്ത്ഥിയാണ് പി.നസീമ. അണ്ണാഡിഎംകെയുടെ സ്ഥാനാര്ത്ഥിയായാണ് നസീമ മണ്ണാര്ക്കാട് നിന്ന് മത്സരിക്കുന്നത്.
