തിരുവനന്തപുരം: ശബരിമല വിഷയത്തില്‍ മന്ത്രി കടകംപള്ളി സുരേന്ദ്രന്‍ നടത്തിയ ഖേദപ്രകടനം വിഡ്ഡിത്തമാണെന്ന് മന്ത്രി എം.എം. മണി.
ഇക്കാര്യത്തില്‍ ഖേദംപ്രകടിപ്പിക്കാന്‍ ആരെയും പാര്‍ട്ടി ചുമതലപ്പെടുത്തിയിട്ടില്ലെന്നും എം.എം. മണി പറഞ്ഞു. ശബരിമല വിഷയത്തില്‍ പഴയ നിലപാട് കടുപ്പിക്കുകയാണ് സിപിഎം എന്ന വ്യക്തമായ സൂചന നല്‍കുകയായിരുന്നു മണി.
ശബരിമലയില്‍ സിപി ഐഎം ജനറല്‍ സെക്രട്ടറി സീതാറാം യെച്ചൂരി പറഞ്ഞതാണ് പാര്‍ട്ടി നിലപാടെന്നും എം.എം. മണി പറഞ്ഞു. ‘അയാള്‍ (കടകംപള്ളി സുരേന്ദ്രന്‍) വെറുതെ വിഡ്ഡിത്തം പറയുന്നതാണ്. ഒരു കാര്യവുമില്ല. അത് പറയേണ്ട കാര്യം അയാള്‍ക്ക് എന്താണുള്ളത്? എന്തെങ്കിലുമുണ്ടെന്ന് തോന്നിന്നില്ല. എനിക്ക് അതിനോടൊന്നും യോജിപ്പുമില്ല. കേസ് വിശാലബെഞ്ചിന്റെ പരിഗണനയിലാണ്. അത് അന്ന് പറ്റിയ വിഢ്ഢിത്തമാണെന്ന് പറയാന്‍ അയാള്‍ക്ക് എന്താണ് അധികാരം? ഖേദം പ്രകടിപ്പിക്കാന്‍ ആരെയും ചുമതലപ്പെടുത്തിയിട്ടില്ല. പുള്ളി കയറി ഏറ്റതാണ്. അതിനൊന്നും പാര്‍ട്ടിക്ക് ഉത്തരവാദിത്വമുണ്ടെന്ന് ഞാന്‍ കരുതുന്നില്ല,’ മന്ത്രി മണി മീഡിയ വണ്ണിന് നല്‍കിയ അഭിമുഖത്തില്‍ പറഞ്ഞു.
കടകംപള്ളി തെരഞ്ഞെടുപ്പായതുകൊണ്ടൊന്നും പറഞ്ഞതല്ല. ബുദ്ധിമോശംകൊണ്ട് പറഞ്ഞതാണെന്നും എം.എം. മണി പരിഹസിച്ചു. സിപിഐ നേതാവ് ആനി രാജ പറഞ്ഞതിലും ശരിയുണ്ടെന്ന് മണി പറഞ്ഞു.
ശബരിമലയില്‍ സ്ത്രീകള്‍ക്ക് പ്രവേശനം അനുവദിച്ച വിധി ലിംഗസമത്വവുമായി ബന്ധപ്പെട്ടതാണ്. സംസ്ഥാനത്തെ ഒരു മന്ത്രി എന്തെങ്കിലും പറഞ്ഞതുകൊണ്ട് ഇടതുപക്ഷ നിലപാട് മാറില്ലെന്നായിരുന്നു സിപി ഐ അഖിലേന്ത്യാനേതാവും ദേശീയ മഹിളാ ഫെഡറേഷന്‍ ജനറല്‍ സെക്രട്ടറിയുമായ ആനിരാജയുടെ പ്രതികരണം.
