ന്യൂദല്‍ഹി: ശബരിമല യുവതീ പ്രവേശന കേസിൽ ഭിന്നവിധി പ്രസ്താവിച്ച് ഏറെ ശ്രദ്ധ പിടിച്ചുപറ്റിയ ജസ്റ്റിസ് ഇന്ദു മല്‍ഹോത്ര വിരമിക്കുന്നു. പദ്മനാഭസ്വാമി ക്ഷേത്ര വിധി പ്രസ്താവിച്ച ബെഞ്ചിലെ അംഗവുമായിരുന്നു ഇന്ദു മൽഹോത്ര. ജസ്റ്റിസ് ഇന്ദു മല്‍ഹോത്രയെക്കാളും മികച്ചൊരു ജഡ്‌ജിയെ തനിക്ക് അറിയില്ലെന്ന് ചീഫ് ജസ്റ്റിസ് എസ്.എ ബോബ്ഡെ യാത്രയയപ്പ് യോഗത്തില്‍ പറഞ്ഞു.
ശബരിമല കേസില്‍ “ഭരണഘടന ധാര്‍മികത ഉയര്‍ത്തിപ്പിടിക്കണം ” എന്ന ഭിന്നവിധിയിലൂടെ ജസ്റ്റിസ് ഇന്ദു മല്‍ഹോത്ര തന്നെ അത്ഭുതപ്പെടുത്തിയെന്ന് അ‌റ്റോര്‍ണി ജനറല്‍ കെ.കെ വേണുഗോപാല്‍ പറഞ്ഞു. ഇന്ദു മല്‍ഹോത്രയുടെ സത്യസന്ധതയും ആത്മാര്‍ത്ഥതയും തന്നെ അത്ഭുതപ്പെടുത്തി. ശബരിമല കേസില്‍ ഭരണഘടനാ ധാര്‍മ്മികത സംബന്ധിച്ച്‌ കൃത്യമായ നിലപാട് ജസ്റ്റിസ് കൈക്കൊണ്ടതായും ഇതിലൂടെ സഹ ജഡ്‌ജിമാര്‍ക്ക് മികച്ച സന്ദേശം ജസ്റ്റിസ് ഇന്ദു മല്‍ഹോത്ര നല്‍കിയെന്നും അ‌റ്റോര്‍ണി ജനറല്‍ അഭിപ്രായപ്പെട്ടു.
ജസ്റ്റിസ് ഇന്ദു മല്‍ഹോത്രയുടെ സുപ്രീം കോടതിയിലെ അവസാന പ്രവര്‍ത്തി ദിവസം ആണിന്ന്. സുപ്രീം കോടതിയിലെ അവസാന പ്രവര്‍ത്തി ദിവസം ചീഫ് ജസ്റ്റിസ് എസ്.എ. ബോബ്ഡെ നേതൃത്വം നല്‍കിയ ബെഞ്ചിന്റെ ഭാഗമായിരുന്നു ജസ്റ്റിസ് ഇന്ദു മല്‍ഹോത്ര. തന്റെ കഴിവിന്റെ പരമാവധി ജുഡീഷ്യല്‍ വ്യവസ്ഥ മെച്ചപ്പെടുത്താന്‍ നല്‍കിയിട്ടുണ്ടെന്ന് നന്ദി പ്രസംഗത്തില്‍ ജസ്റ്റിസ് ഇന്ദു മല്‍ഹോത്ര പറഞ്ഞു. ശേഷം വികാരാധീനയായതിനെ തുടര്‍ന്ന് പ്രസംഗം പൂര്‍ത്തിയാക്കാന്‍ കഴിഞ്ഞില്ല.
നാളെ ആണ് ഔദ്യോഗികമായി ജസ്റ്റിസ് ഇന്ദു മല്‍ഹോത്ര വിരമിക്കുന്നത്.
