കണ്ണൂര്‍: ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ നയിക്കുന്ന വിജയ യാത്രയില്‍ പങ്കെടുക്കാന്‍ കേന്ദ്ര ഗതാഗത സഹമന്ത്രി വികെ സിംഗ് എത്തിയത് തനി മലയാളി വേഷത്തില്‍. കസവു മുണ്ടിനൊപ്പം കുറിതൊട്ട് ഫുള്‍ സ്ലീവ് ഷര്‍ട്ട് ധരിച്ചാണ് അദേഹം കണ്ണൂരില്‍ എത്തിയത്. മലയാളിവേഷം കൊള്ളാമെന്ന് കമന്റ് പറഞ്ഞ മാധ്യമ പ്രവര്‍ത്തകന് തമിഴ്‌നാട്ടില്‍ ആയിരുന്നെങ്കില്‍ താന്‍ ഹാഫ് കൈ ഷര്‍ട്ട് ധരിച്ചേനെ എന്നായിരുന്നു ചിരി കലര്‍ത്തി മുന്‍ കരസേനാ മേധാവി നല്‍കിയ മറുപടി.
കെ സുരേന്ദ്രന്‍ നയിക്കുന്ന വിജയയാത്ര ഇന്ന് കണ്ണൂര്‍ ജില്ലയില്‍ പര്യടനം നടത്തി. കണ്ണൂരില്‍ നടന്ന പൊതു സമ്മേളനം കേന്ദ്രമന്ത്രി വികെ സിംഗ് ഉദ്ഘാടനം ചെയ്തു. വരുന്ന നിയമസഭാ തെരഞ്ഞെടുപ്പില്‍ കേരളത്തില്‍ ബിജെപി വന്‍ മുന്നേറ്റം നടത്തുമെന്ന് അദേഹം പ്രതികരിച്ചു. കേരളത്തിന്റെ തൊഴില്‍ സംസ്‌കാരം ഇടതു പക്ഷം തകര്‍ത്തു. മോദി സര്‍ക്കാര്‍ സഹായിച്ചതുപോലെ മറ്റൊരു സര്‍ക്കാരും കേരളത്തെ ഇത്രത്തോളം സഹയിച്ചിട്ടില്ലെന്നും വികെ സിംഗ് ജന്മഭൂമിക്ക്‌ നല്‍കിയ അഭിമുഖത്തില്‍ പറഞ്ഞു.
