ന്യൂദല്ഹി:ഇസ്രയേല് എംബസിക്കു സമീപമുണ്ടായ സ്ഫോടനം ദേശീയ അന്വേഷണ ഏജന്സി(എന്ഐഎ) അന്വേഷിക്കും. കേസ് എന്ഐഎയ്ക്ക് കൈമാറാനായി കേന്ദ്ര ആഭ്യന്തരമന്ത്രാലയം ഉത്തരവിറക്കിയതായി ദേശീയമാധ്യമങ്ങള് റിപ്പോര്ട്ട് ചെയ്യുന്നു. ഉത്തരവിറങ്ങിയ സാഹചര്യത്തില് ആവശ്യമായ വകുപ്പുകള് ചുമത്തി എന്ഐഎ ഉടന് കേസ് എടുത്ത് അന്വേഷണം ആരംഭിക്കും.
അന്വേഷണം കൈമാറിയതോടെ ദല്ഹി പൊലീസ് സ്പെഷ്യല് സെല് ഇതുമായി ബന്ധപ്പെട്ട തെളിവുകളും രേഖകളും എന്ഐഎയ്ക്ക് കൈമാറേണ്ടിവരും. സ്ഫോടനം നടന്ന സ്ഥലം നേരത്തേ എന്ഐഎ സംഘം സന്ദര്ശിച്ചിരുന്നു. സംഘത്തിനൊപ്പം ഐജി തലത്തിലുള്ള മുതിര്ന്ന ഉദ്യോഗസ്ഥനുമുണ്ടായിരുന്നു. കേസില് കാര്യമായ പുരോഗതിയുണ്ടാക്കാനോ, അന്വേഷണം ആരിലേക്കെങ്കിലം കൊണ്ടെത്തിക്കാനോ ദല്ഹി പൊലീസ് സ്പെഷല് സെല്ലിന് ഇതുവരെയായിട്ടില്ല.
ജനുവരി 29ന് എംബസിക്ക് സമീപം നടന്ന ചെറു സ്ഫോടനത്തിന് പിന്നിലുള്ളവരെ നിയമത്തിന് മുന്നിലെത്തിക്കുമെന്നു കഴിഞ്ഞ ദിവസം പ്രധാനമന്ത്രി നരേന്ദ്രമോദി ഇസ്രയേല് പ്രധാനമന്ത്രി ബെഞ്ചമിന് നെതന്യാഹുവിന് ഉറപ്പ് നല്കിയിരുന്നു. ഇസ്രയേലി നയതന്ത്ര ഉദ്യോഗസ്ഥരുടെയും എംബസിയുടെയും സുരക്ഷയ്ക്ക് ഇന്ത്യ വലിയ പ്രധാന്യമാണ് നല്കുന്നതെന്നും മോദി വ്യക്തമാക്കിയിരുന്നു.
