അയര്‍ക്കുന്നം: ജയരാജിന് ലോട്ടറി വില്‍ക്കാന്‍ സൈക്കിള്‍ വാങ്ങി നല്‍കി ബിജെപി പ്രവര്‍ത്തകര്‍. അയര്‍ക്കുന്നം പഞ്ചായത്ത് 14 – ാം വാര്‍ഡ് നരിമറ്റം ഭാഗത്തെ ജയരാജിനാണ് ബിജെപി പ്രവര്‍ത്തകര്‍ സൈക്കിള്‍ സമ്മാനിച്ചത്.
സ്വന്തമായുണ്ടായിരുന്ന സൈക്കിള്‍ നശിച്ചതിനെത്തുടര്‍ന്ന് ജയരാജ് നടന്നാണ് ലോട്ടറി വില്‍പ്പന നടത്തിയിരുന്നത്. ഈ ദുരിതം ശ്രദ്ധയില്‍പ്പെട്ടതിനെ തുടര്‍ന്ന് ജയരാജിന് സൈക്കിള്‍ വാങ്ങിനല്‍കണമെന്ന് ബിജെപി പ്രവര്‍ത്തകര്‍ തീരുമാനിക്കുകയായിരുന്നു. ഗ്രാമപഞ്ചായത്ത് അംഗം മഞ്ജു സുരേഷിന്റെ നേതൃത്വത്തില്‍ വാങ്ങിയ സൈക്കിള്‍ 26-ാം ബൂത്ത് സമ്മേളനത്തില്‍ വെച്ച് കൈമാറി.
ബൂത്ത് സമ്മേളനം ബിജെപി ജില്ലാ സെല്‍ കോ- ഓര്‍ഡിനേറ്റര്‍ കെ.ജി. കണ്ണന്‍ ഉദ്ഘാടനം ചെയ്തു. ബൂത്ത് പ്രസിഡന്റ് പ്രസാദ് പെരുമനശ്ശേരി അദ്ധ്യക്ഷനായി.
കര്‍ഷകമോര്‍ച്ച ജില്ലാ വൈസ് പ്രസിഡന്റ് ഹരിപ്രസാദ്, മണ്ഡലം ജനറല്‍ സെക്രട്ടറി സുനില്‍ കുമാര്‍, പ്രസാദ് കുന്നുംപുറം, സുരാജ്, ഷൈലജ ജ്യോതിലാല്‍, വിജയകുമാര്‍, പത്മദാസ്, ഇന്ദു സുരേഷ്, പഞ്ചായത്ത് അംഗങ്ങളായ രാജശ്രീ, മഞ്ജു സുരേഷ് എന്നിവര്‍ പങ്കെടുത്തു.
