തിരുവനന്തപുരം: പ്രധാനമന്ത്രി നരേന്ദ്ര മോദി വീണ്ടും കേരളത്തില് എത്തിയേക്കുമെന്ന് റിപ്പോര്ട്ട്. ആലപ്പുഴ ബൈപാസ് ഉദ്ഘാടനത്തിന് എത്താന് പ്രധാനമന്ത്രിക്കു താല്പര്യമുണ്ടെന്ന് അറിയിപ്പു കിട്ടിയതായി പൊതുമരാമത്ത് വകുപ്പ് മന്ത്രി ജി.സുധാകരന്റെ ഓഫീസില് നിന്നും വ്യക്തമാക്കി. കഴിഞ്ഞ 20ന് ആണ് പ്രധാനമന്ത്രിയുടെ ഓഫീസില് നിന്നും ഇതുസംബന്ധിച്ച ഇമെയില് സന്ദേശം ലഭിച്ചത്.
പ്രധാനമന്ത്രിയുടെ വരവിനെ സ്വാഗതം ചെയ്യുന്നതായി തിരികെ അറിയിച്ചിട്ടുണ്ടെന്നും മന്ത്രി പറഞ്ഞു. കേന്ദ്ര സര്ക്കാരിന് കീഴിലുള്ളതാണ് ബൈപാസ് പദ്ധതി. അതിന്റെ ഉദ്ഘാടനത്തിന് പ്രധാനമന്ത്രി എത്തുന്നത് സന്തോഷമുള്ള കാര്യമാണ്. പദ്ധതിക്ക് അതിലൂടെ കൂടുതല് പ്രാധാന്യം ലഭിക്കുകയും ചെയ്യുമെന്നും ജി സുധാകരന് വ്യക്തമാക്കി.
ബൈപാസിന്റെ പണി അവസാന ഘട്ടത്തിലാണ്. അവ പൂര്ത്തിയാക്കി ഈ മാസം അവസാനമോ ജനുവരിയിലോ കമ്മിഷന് ചെയ്യാമെന്നാണ് ആലോചിക്കുന്നത്. ആദ്യ പദ്ധതിയില് അപ്രോച്ച് റോഡുകള് വിഭാവനം ചെയ്തിരുന്നില്ല. എല്ഡിഎഫ് സര്ക്കാര് വന്ന ശേഷമാണ് അത്തരം പ്രശ്നങ്ങള് പലതും പരിഹരിച്ചത്.
