ബംബോലിം: ഏഴാമത് ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്‌റ്റേഴ്‌സിന് തോല്‍വിത്തുടക്കം. ഉദ്ഘാടന മത്സരത്തില്‍ എടികെ മോഹന്‍ ബഗാനോട് ഏകപക്ഷീയമായ ഒരു ഗോളിന് തോറ്റു. രണ്ടാം പകുതിയില്‍ സൂപ്പര്‍ താരം റോയ് കൃഷ്ണയാണ് വിജയഗോള്‍ നേടിയത്. നിലവിലെ ചാമ്പ്യന്മാരായ എടികെ മോഹന്‍ ബഗാന് ഈ വിജയത്തോടെ മൂന്ന് പോയിന്റായി.
തുടക്കത്തില്‍ കളി വിരസമായിരുന്നു. ആദ്യത്തെ അരമണിക്കൂറില്‍ പന്ത് മൈതാനമധ്യത്തില്‍ ചുറ്റിത്തിരിഞ്ഞു. വിരലില്‍ എണ്ണാവുന്ന നീക്കങ്ങളാണ് ഇരു ടീമുകളുടെ ഭാഗത്ത് നിന്ന് ഉണ്ടായത്. എ്ന്നാല്‍ ഡ്രിങ്ക്‌സിനുശേഷം കളി ചുടുപിടിച്ചു. ഇരു ഗോള്‍മുഖത്തും പന്ത് കയറിയിറങ്ങി.
എടികെ മോഹന്‍ ബഗാനാണ് ഗോള്‍ അടിക്കാന്‍ ആദ്യം അവസരം കൈവന്നത്. ബ്ലാസ്‌റ്റേഴ്‌സിന്റെ പ്രതിരോധ പിഴവില്‍ പന്ത് കിട്ടിയ റോയ് കൃഷ്ണ ഗോളി മാത്രം മുന്നില്‍ നില്‍ക്കെ തൊടുത്തുവിട്ട ഷോട്ട് പോസ്റ്റിന് മുകളിലൂടെ പറന്ന് അകന്നു. ബ്ലാസ്‌റ്റേഴ്‌സിന്റെ ഇംഗ്ലീഷ് താരം ഗാരി ഹൂപ്പറും അവസരം തുലച്ചു. ഗോള്‍ മുഖത്തിനടുത്ത് നിന്നുള്ള ഹൂപ്പറുടെ ഹെഡ്ഡര്‍ പുറത്തേക്ക് പോയി.
ആദ്യ പകുതിയുടെ അവസാന നിമിഷങ്ങളില്‍ ലഭിച്ച ഫ്രി കിക്കും ബ്ലാസ്‌റ്റേഴ്‌സിന് മുതലാക്കാനായില്ല. സിഡോഞ്ചയില്‍ നിന്ന പന്ത് സ്വീകരിച്ച ജെസലിന്റെ ലോങ് റേഞ്ചര്‍ എടികെ മോഹന്‍ ബഗാന് പ്രതിരോധ താരത്തിന് ദേഹത്ത് തട്ടി പുറത്തേക്ക് പോയി. തുടര്‍ന്ന് ലഭിച്ച കോര്‍ണര്‍ കിക്കും ലക്ഷ്യത്തില്‍ എത്തിക്കാനായില്ല.
രണ്ടാം പകുതിയുടെ തുടക്കത്തില്‍ തന്നെ ബ്ലാസ്‌റ്റേഴ്‌സ് മുന്നിലെത്തിയെന്ന് തോന്നി. പക്ഷെ ജെസലിന്റെ പാസ് സ്വീകരിച്ച സഹല്‍ പന്ത് പുറത്തേക്ക് അടിച്ചുകളഞ്ഞു.
67-ാം മിനിറ്റില്‍ എടികെ മോഹന്‍ ബഗാന് ലീഡ് നേടി. മന്‍വീര്‍ നീട്ടിക്കൊടുത്ത പന്ത് റോയ് കൃഷ്ണ മികച്ചൊരു ഷോട്ടിലൂടെ ബ്ലാസ്‌റ്റേഴ്‌സിന്റെ വലയിലാക്കി.
ഗോള്‍ മടക്കാനായി ബ്ലാസ്‌റ്റേഴ്‌സ് പൊരുതിയെങ്കിലും എടികെ മോഹന്‍ ബഗാന് പ്രതിരോധം ശക്തമാക്കി ബ്ലാസ്‌റ്റേഴ്‌സിന്റെ നീക്കങ്ങള്‍ തടഞ്ഞു.
