ഹൈദരാബാദ്: ദക്ഷിണേന്ത്യയില്‍ ബിജെപിയുടെ മുന്നേറ്റം അസാധ്യമെന്നു പറയുന്നവര്‍ക്കു മുന്നറിയിപ്പായി തെലങ്കാനയില്‍ പാര്‍ട്ടിയുടെ ഉജ്വല വിജയം. തെലങ്കാനയിലെ ഭരണകക്ഷിയായ ടിആര്‍എസിന്റെ ഉരുക്കുകോട്ടയായ ദുബ്ബക നിയമസഭാ മണ്ഡലത്തില്‍ ബിജെപി ഇന്നലെ നേടിയത് അട്ടിമറി വിജയം. ബിജെപിയുടെ എം. രഘുനന്ദന്‍ റാവുവാണ് ടിആര്‍എസിനെയും കോണ്‍ഗ്രസിനേയും ഞെട്ടിച്ചത്.
ടിആര്‍എസിലെ സോലിപ്പേട്ട സുജാതയെ 1470 വോട്ടുകള്‍ക്കാണ് രഘുനന്ദന്‍ റാവു പരാജയപ്പെടുത്തിയത്. കഴിഞ്ഞ ആഗസ്റ്റില്‍ സോലിപ്പേട്ട രാമലിംഗറാവു മരണമടഞ്ഞതിനെത്തുടര്‍ന്നാണ് ദുബ്ബക്കില്‍ ഉപതെരഞ്ഞെടുപ്പു നടത്തിയത്. രാമലിംഗ റാവുവിന്റെ ഭാര്യ സുജാതയെ മത്സരത്തിനിറക്കി സഹതാപ തരംഗത്തില്‍ ജയിച്ചു കയറാനാണ് ടിആര്‍എസ് നേതാവും മുഖ്യമന്ത്രിയുമായ ടി. ചന്ദശേഖര റാവു തന്ത്രമൊരുക്കിയത്.
എന്നാല്‍ വ്യക്തമായ ഒരുക്കങ്ങളോടെ തെരഞ്ഞെടുപ്പിനെ നേരിട്ട ബിജെപി ഉജ്വല വിജയം നേടുകയായിരുന്നു. മത്സരരംഗത്തുണ്ടായിരുന്ന കോണ്‍ഗ്രസിനെ അപ്രസക്തമാക്കുന്ന മുന്നേറ്റമാണ് ബിജെപി കാഴ്ചവച്ചത്. സിദ്ദിപ്പേട്ട് എന്‍ജിനീയറിങ് കോളേജിലായിരുന്നു വോട്ടെണ്ണല്‍. ഓരോ നിമിഷവും മാറിമറിഞ്ഞ ലീഡു നില ബിജെപി, ടിആര്‍എസ് ക്യാമ്പുകളില്‍ ഉദ്വേഗം പടര്‍ത്തി.
ദുബ്ബക മണ്ഡലത്തിലെ ഫലത്തിന് സാധാരണ ഉപതെരഞ്ഞെടുപ്പ് ഫലത്തിനപ്പുറം പ്രാധാന്യമുണ്ടെന്നുറപ്പുള്ളതുകൊണ്ട് പ്രചാരണത്തിനു ചുക്കാന്‍ പിടിക്കാന്‍ തെലങ്കാന ധനമന്ത്രിയും മുതിര്‍ന്ന ടിആര്‍എസ് നേതാവുമായ ഹരീഷ് റാവു നേരിട്ടിറങ്ങി. ടിആര്‍എസിലെ ഏറ്റവും തന്ത്രശാലിയായ തെരഞ്ഞെടുപ്പ് ആസൂത്രകന്‍ എന്നാണ്, ചന്ദ്രശേഖര റാവുവിന്റെ മരുമകന്‍ കൂടിയായ ഹരീഷ് റാവുവിനുള്ള വിശേഷണം. കഴിഞ്ഞ മൂന്നു മാസമായി ഹരീഷ് റാവു ദുബ്ബകയില്‍ ക്യാമ്പു ചെയ്യുകയായിരുന്നു. പക്ഷേ, ബിജെപിയുടെ മറു തന്ത്രങ്ങളില്‍ ടിആര്‍എസിന്റെ നീക്കങ്ങള്‍ ഒലിച്ചു പോയി.
ദുബ്ബകയിലെ വിജയം വരുംനാളില്‍ തെലങ്കാനയിലെ ബിജെപിയുടെ മുന്നേറ്റത്തിനു ചൂണ്ടുപലക എന്ന് നിരീക്ഷകര്‍ വിലയിരുത്തുന്നു. മണ്ഡലത്തിന്റെ അതിരുകളാണ് അതിനു തെളിവ്. മുഖ്യമന്ത്രിയുടെ ചന്ദ്രശേഖര റാവുവിന്റെ ഗജ്‌വെല്‍, മുഖ്യമന്ത്രിയുടെ മകനും ടിആര്‍എസിലെ കരുത്തനുമായ മന്ത്രി കെ.ടി. രാമറാവുവിന്റെ സിര്‍സില, ഹരീഷ് റാവുവിന്റെ സിദ്ദിപ്പേട്ട് എന്നീ മണ്ഡലങ്ങളാണ് ദുബ്ബകയോടു ചേര്‍ന്നു കിടക്കുന്നത്. ബിജെപിയുടെ വിജയം ടിആര്‍എസിന്റെ ശക്തിദുര്‍ഗങ്ങളായ ഈ മണ്ഡലങ്ങളേയും സ്വാധീനിക്കും എന്നാണ് രാഷ്‌ട്രീയ നിരീക്ഷകര്‍ പറയുന്നത്.
കഴിഞ്ഞ ലോക്‌സഭാ തെരഞ്ഞെടുപ്പില്‍ ചന്ദ്രശേഖര റാവുവിന്റെ മകള്‍ കവിത റാവുവിനെ അടക്കം അട്ടിമറിച്ച് സംസ്ഥാനത്ത് മിന്നുന്ന പ്രകടനമാണ് ബിജെപി കാഴ്ചവച്ചത്. ദുബ്ബകയിലെ വിജയത്തോടെ തെലങ്കാനയില്‍ ടിആര്‍എസിനെ നേരിടാന്‍ കോണ്‍ഗ്രസിനേക്കാള്‍ കരുത്ത് ബിജെപിക്കാണെന്നും തെളിഞ്ഞുവെന്നാണ് വിലയിരുത്തല്‍.
