കോയമ്പത്തൂര്:സ്വര്ണ്ണക്കടത്തു കേസുമായി ബന്ധപ്പെട്ട് കോയമ്പത്തൂരിലെ സ്വര്ണ വ്യാപാരി എന്ഐഎ പിടിയില്. കോയമ്പത്തൂര് പവിഴം വീഥിയില് നന്ദകുമാറിനെയാണ് എന്ഐഎ കസ്റ്റഡിലെടുത്തത്. പവിഴം ജുവല്ലറി കേന്ദ്രീകരിച്ചാണ് നിലവില് തെരച്ചില് നടത്തുന്നത്.
തിരുവനന്തപുരം വിമാനത്താവളത്തിലെ ഡിപ്ലോമാറ്റിക് ബാഗേജ് വഴിയുള്ള സ്വര്ണക്കടത്തില് പങ്കുണ്ടെന്ന സംശയത്തിലാണ് തെരച്ചില് നടത്തിയത്.
ഡിഎസ്പി ഷൗക്കത്ത് അലിയുടെ നേതൃത്വത്തില് നാലംഗ സംഘം ഇന്ന് രാവിലെ എത്തി പരിശോധന നടത്തിയിരുന്നു. എന്ഐഎയുടെ കൊച്ചി, ചെന്നൈ ഓഫീസിലെ ഉദ്യോഗസ്ഥരാണ് റെയ്ഡിന് നേതൃത്വം നല്കിയത്. അതിനു പിന്നാലെയാണ് അന്വേഷണ സംഘം ഇയാളെ കസ്റ്റഡിയിലെടുത്തു ചോദ്യം ചെയ്യുന്നത്. നന്ദകുമാറിനെ കോയമ്പത്തൂര് റേസ് കോഴ്സിലുള്ള എന്ഐഎയുടെ ഓഫീസിലേക്ക് കൊണ്ടുപോയി.
ഏതാനും ആഴ്ചകള് മുമ്പ് തിരുച്ചിറപ്പള്ളിയിലെ ജൂവലറികള് കേന്ദ്രീകരിച്ച് എന്ഐഎ അന്വേഷണം നടത്തുകയും മൂന്ന് പേരെ അറസ്റ്റ് ചെയ്യുകയും ചെയ്തിരുന്നു. ഇതിന്റെ തുടര്ച്ചയായാണ് ഇന്ന് റെയ്ഡ് നടത്തിയിരിക്കുന്നത്.
