ന്യൂദല്‍ഹി : പുല്‍വാമ ഭീകരാക്രമണത്തിന് പിന്നില്‍ 23 കാരിയെന്ന് ദേശീയ അന്വേഷണ ഏജന്‍സി. ഇന്‍ഷാ ജാന്‍ എന്ന യുവതിയാണ് പുല്‍വാമ ഭീകരാക്രമണത്തിനായി പാക്കിസ്ഥാന്‍ കേന്ദ്രീകരിച്ചു പ്രവര്‍ത്തിക്കുന്ന ജെയ്ഷ ഇ മുഹമ്മദിന് സഹായങ്ങള്‍ നല്‍കിയത്.
ഭീകരാക്രമണത്തിന്റെ മുഖ്യ സൂത്രധാരനായ ഉമര്‍ ഫാറൂഖുമായി ഇന്‍ഷാ ജാന്‍ നിരവധി തവണ ഫോണില്‍ ബന്ധപ്പെട്ടതായും റിപ്പോര്‍ട്ടില്‍ പറയുന്നുണ്ട്. ഇവര്‍ സമൂഹ മാധ്യമങ്ങള്‍ വഴിയും ആശയ വിനിമയം നടത്തിയിട്ടുണ്ടെന്ന് ദേശീയ അന്വേഷണ ഏജന്‍സി അറിയിച്ചു.
ആക്രമണത്തിന്റെ ഉത്തരവാദിത്തം ഏറ്റെടുത്ത് ജയ്ഷ്-ഇ-മുഹമ്മദ് പുറത്തു വിട്ട വീഡിയോ ചിത്രീകരിച്ചത് ഇന്‍ഷായുടെ വീട്ടില്‍ വെച്ചാണ്. ഇവരുടെ പിതാവിനും അവരുടെ ഭീകര ബന്ധത്തെ കുറിച്ച് അറിവുണ്ടായിരുന്നു. ഭീകരവാദികള്‍ക്ക് താമസം ഭക്ഷണം തുടങ്ങി ആക്രമണത്തിന് വേണ്ട എല്ലാ സഹായവും ചെയ്തത് ഇവരാണ്.
2018-19ലും ഭീകരര്‍ ഇവരുടെ വീട്ടില്‍ ഭീകരര്‍ ദിവസങ്ങളോളം താമസിച്ചിരുന്നു. ഇവര്‍ക്കായി കശ്മീരിലെ സൈന്യത്തിന്റെ പ്രവര്‍ത്തികള്‍ നിരീക്ഷിച്ച് റിപ്പോര്‍ട്ടുകളും കൈമാറിയിരുന്നു. ഇന്‍ഷ കൈമാറിയ വിവരങ്ങളുടേയും കൂടി അടിസ്ഥാനത്തിലാണ് പുല്‍വാമയില്‍ ജെയ്ഷ ഭീകരാക്രമണത്തിന് പദ്ധതി തയ്യാറാക്കിയത്. ഇവര്‍ ഉമര്‍ ഫാറൂഖുമായി നടത്തിയ വാട്‌സാപ്പ് സന്ദേശങ്ങള്‍ എന്‍ഐഎ വീണ്ടെടുത്തിട്ടുണ്ട്.
