പത്തനാപുരം: സിവില് സര്വീസ് പരീക്ഷയില് 291-ാം റാങ്ക് കരസ്ഥമാക്കി അഗ്നിശമനസേനയ്ക്ക് അഭിമാനമായി മാറിയ ആശിഷ് ദാസിന് അഭിനന്ദന പ്രവാഹം. കേരള ഫയര് സര്വീസ് അസോസിയേഷന്റെ നേതൃത്വത്തില് ആശിഷിനെ അനുമോദിച്ചു. പത്തനാപുരം അഗ്നി രക്ഷാ നിലയത്തില് ഡയറക്ടര് ജനറല് ആര്. ശ്രീലേഖ ഐപിഎസ് നേരിട്ടെത്തിയാണ് ആശിഷിന് ഉപഹാരം നല്കി അനുമോദിച്ചത്.
ഡയറക്ടര് ടെക്നിക്കല് നൗഷാദ്, റീജിയണല് ഫയര് ഓഫീസര്മാരായ അരുണ് അല്ഫോണ്സ്, സിദ്ധകുമര്, ജില്ലാ ഫയര് ഓഫീസര് ഹരികുമാര്, സ്റ്റേഷന് ഓഫീസര് ഗിരീഷ് കുമാര്, കെഎഫ്എസ്എ സംസ്ഥാന സെക്രട്ടറി അജിത്ത് കുമാര്, പ്രസിഡന്റ് ഷജില് കുമാര് എന്നിവര് പങ്കെടുത്തു. ഫയര് സര്വീസിന്റെ ചരിത്രത്തില് ആദ്യമായായാണ് ഒരാള് സിവില് സര്വീസ് നേടിയതെന്നും അഭിമാനനിമിഷമാണിതെന്നും പത്തനാപുരം ഫയര്സ്റ്റേഷന് കെട്ടിട നിര്മാണത്തിന് പ്രഥമ പരിഗണന നല്കുമെന്നും ശ്രീലേഖ ഐപിഎസ് പറഞ്ഞു.
