ഇടുക്കി: കുഞ്ചിത്തണ്ണിക്ക് സമീപം പൊട്ടന്കാട്ടില് ഏലത്തോട്ടത്തില് പണികള് ചെയ്യുകയായിരുന്ന രണ്ടു സ്ത്രീകള് ഉള്പ്പെടെ മൂന്ന് പേര്ക്ക് കാട്ടുപന്നിയുടെ ആക്രമണത്തില് പരിക്കേറ്റു. പൊട്ടന്കാട് മുതിരക്കാലായില് സാബു (48), ടീ കമ്പനി സ്വദേശികളായ ദീപ (40), ചിത്ര (21) എന്നിവര്ക്കാണ് പരിക്കേറ്റത്. മൂവരെയും അടിമാലി താലൂക്ക് ആശുപത്രിയില് പ്രവേശിപ്പിച്ചു.
ഇന്നലെ രാവിലെ ഒന്പതിനാണ് സംഭവം. പൊട്ടന്കാട്ടില് ഏലത്തോട്ടം പാട്ടത്തിനെടുത്ത് കൃഷി ചെയ്യുന്ന പറമ്പില് പണികള് നടത്തുകയായിരുന്ന ദീപയെയും ചിത്രയെയുമാണ് ആദ്യം കാട്ടുപന്നി ആക്രമിച്ചത്. ഇവര് ബഹളം വെച്ചതിനെ തുടര്ന്ന് സാബു ഓടിയെത്തി ഇവരെ രക്ഷിക്കാന് ശ്രമിച്ചു. ഇതിനിടെ കാട്ടുപന്നി സാബുവിനെയും ആക്രമിച്ച ശേഷം കാട്ടില് മറയുകയായിരുന്നു.
