കാസര്‍കോട്: കേരളാ മുഖ്യമന്ത്രി പിണറായി വിജയന്‍ ജനനായകനല്ല അധോലോക നായകനായെന്ന് ബിജെപി സംസ്ഥാന ഉപാദ്ധ്യക്ഷന്‍ എ.പി. അബ്ദുള്ളക്കുട്ടി കുറ്റപ്പെടുത്തി. സ്വര്‍ണ്ണ കള്ളകടത്തു കേസില്‍ ഒത്താശ ചെയതു കൊടുത്ത മുഖ്യമന്ത്രി രാജി വെയ്‌ക്കുകയെന്നാവശ്യപ്പെട്ടുകൊണ്ട് കാസര്‍കോട് ഒപ്പുമരച്ചുവട്ടില്‍ ബിജെപി ജില്ലാ കമ്മറ്റി സംഘടിപ്പിച്ച സത്യാഗ്രഹ സമരം ഉദ്ഘാടനം ചെയ്യുകയായിരുന്നു അദ്ദേഹം. കേരളം തീവ്രവാദികളുടെ സുരക്ഷിത താവളമാണെന്നും കള്ളകടത്തുകാരുടെ ഒളിത്താവളമാണെന്നും വര്‍ഷങ്ങളായി ബിജെപി മുന്നറിയിപ്പ് കൊടുത്തു കൊണ്ടിരിക്കുകയാണ്.
ഇന്ന് മുഖ്യമന്ത്രിയുടെ ഓഫീസിലെ ഏറ്റവും മുതിര്‍ന്ന ഉദ്യോഗസ്ഥന്‍ പ്രിന്‍സിപ്പല്‍ സെക്രട്ടറിയും ഐ.ടി. സെക്രട്ടറിയുമായിരുന്ന ആള്‍ വിദേശത്തു നിന്നും സ്വര്‍ണ്ണം കള്ളകടത്തായി കൊണ്ടുവരാന്‍ ഒത്താശ ചെയ്‌തെന്ന് ഉറപ്പായതോടെ വര്‍ഷങ്ങളായി ബിജെപി നല്‍കി വരുന്ന മുന്നറിയിപ്പുകള്‍ സത്യമാണെന്ന് തെളിഞ്ഞിരിക്കുകയാണ്. മുഖ്യമന്ത്രിയും പ്രിന്‍സിപ്പല്‍ സെക്രട്ടറിയും കൂടാതെ ഉന്നത വിദ്യാഭ്യാസ മന്ത്രി കെ.ടി.ജലീലും സ്വര്‍ണ്ണ കടത്ത് കേസില്‍ ഉള്‍പ്പെട്ട വിവരമാണ് ചോദ്യം ചെയ്യലില്‍ നിന്ന് വ്യക്തമായി കൊണ്ടിരിക്കുന്നത്.
സംസ്ഥാന വ്യാപകമായി ബിജെപി നടത്തി കൊണ്ടിരിക്കുന്ന സമര പരമ്പരകള്‍ പിണറായി വിജയന്‍ രാജി വെയ്‌ക്കുന്നതു വരെ തുടരുമെന്നും അബ്ദുള്ള കുട്ടി വ്യക്തമാക്കി. സത്യാഗ്രഹസമരത്തില്‍ ജില്ലാ അധ്യക്ഷന്‍ കെ.ശ്രീകാന്ത് അദ്ധ്യക്ഷത വഹിച്ചു.
സംസ്ഥാന സമിതി അംഗം പി. രമേശ്, മേഖല വൈസ് പ്രസിഡന്റ് സതീശ്ചന്ദ്ര ഭണ്ടാരി, ജില്ലാ വൈസ് പ്രസിഡന്റ് അഡ്വ സദാനന്ദ റൈ, സെക്രട്ടറിമാരായ വിജയ്‌കുമാര്‍ റൈ, മനുലാല്‍ മേലത്ത്, യുവമോര്‍ച്ച ജില്ലാ പ്രസിഡന്റ് ധനഞ്ജയന്‍ മധൂര്‍, പി.ആര്‍.സുനില്‍ എന്നിവര്‍ സംസാരിച്ചു. ബിജെപി ജില്ലാ ജനറല്‍ സെക്രട്ടറി എ.വേലായുധന്‍ സ്വാഗതവും സെക്രട്ടറി എന്‍.സതിഷ് നന്ദിയും പറഞ്ഞു.
