പത്തനാപുരം: തലവൂരില് ക്ഷീരകര്ഷകന് നേരെ അയല്വാസിയുടെ ആസിഡ് ആക്രമണം. തിരുവിതാംകൂര് ദേവസ്വം ബോര്ഡ് സബ്ഗ്രൂപ്പ് ഓഫീസര് കൂടിയായ നടുത്തേരി മീരാഭവനില് പി.ജി. വാസുദേവന് ഉണ്ണി(55), ബന്ധുവായ ശ്രീഭവനില് അജിത്ത്(35) എന്നിവര്ക്ക് നേരെയാണ് ആക്രമണമുണ്ടായത്. ഇന്നലെ പുലര്ച്ചെ 1.30നായിരുന്നു സംഭവം.
മുഖത്തും ശരീരത്തും പൊള്ളലേറ്റ ഇരുവരേയും കൊട്ടാരക്കരയിലെ സ്വകാര്യ ആശുപത്രിയില് പ്രവേശിപ്പിച്ചു. സംഭവത്തില് തലവൂര് നടുത്തേരി കോരനല്ലൂര് പുത്തന് വീട്ടില് വര്ഗീസിനെ(70) കുന്നിക്കോട് പോലീസ് അറസ്റ്റ് ചെയ്തു. അയല്വാസിയായ വര്ഗീസ്, വാസുദേവന് ഉണ്ണിയുടെ ഉടമസ്ഥതയിലുളള പശുവളര്ത്തില് കേന്ദ്രത്തിലേക്ക് കൊണ്ടുവരുന്ന കാലിത്തീറ്റയില് രാത്രിസമയത്ത് വിഷം തളിക്കുകയും നിര്ത്തിയിടുന്ന ഫാമിലെ വാഹനങ്ങള്ക്ക് കേടുപാട് വരുത്തുന്നതും പതിവായിരുന്നു.
വെള്ളിയാഴ്ച പുലര്ച്ചെയോടെ സംശയം തോന്നിയ ഫാമുടമകള് നടത്തിയ പരിശോധനയില് വര്ഗ്ഗീസ് വാഹനം നശിപ്പിക്കുന്നതായി കണ്ടെത്തി. ഇയാളെ വാഹനത്തില് നിന്ന് ഇറക്കുന്നതിനിടെ കയ്യില് കരുതിയിരുന്ന ആസിഡ് ഇരുവരുടെയും ശരീരത്തില് ഒഴിക്കുകയായിരുന്നു.
