കുണ്ടറ: യുവാവ് കൊല്ലപ്പെട്ട സംഭവത്തില് രണ്ടു പ്രതികളെ കൊച്ചിയില്നിന്നും പോലീസ് പിടികൂടി. പേരയം ചേരിയില് വായനശാല മുക്കില് മാലിയില് പുത്തന്വീട്ടില് പ്രജീഷ്(23), കല്ലുവിള ബിന്റോ ഭവനത്തില് ബിന്റോബാബു(21) എന്നിവരെയാണ് കുണ്ടറ പോലീസ് അറസ്റ്റ് ചെയ്തത്.
കരിക്കുഴി അഷ്ടമുടി പൊയ്ക മേലതില് ഷക്കീര് ബാബു(28) ആണ് മരിച്ചത്. നിരന്തരം ഉപദ്രവിക്കുന്നതിലുള്ള വിരോധത്തിലാണ് കൊലപാതകം നടത്തിയതെന്നാണ് പ്രതികള് പറഞ്ഞത്. കുണ്ടറ ഇന്സ്പെക്ടര് ജയകൃഷ്ണന്, എസ്ഐ വിദ്യാധിരാജ്, എഎസ്ഐമാരായ ആഷിഷ് കോഹൂര്, അജയകുമാര്, ഡ്രൈവര് എസ്ഐ അജയകുമാര് എന്നിവര് ചേര്ന്ന സംഘമാണ് പ്രതികളെ അറസ്റ്റ് ചെയ്തത്. മരണപ്പെട്ട ഷക്കീര് ബാബു പ്രതിയായ പ്രജീഷിന്റെ സഹോദരിയെ ശല്യം ചെയ്തിരുന്നതിനെ തുടര്ന്ന് ചെറിയതോതില് സംഘര്ഷമുണ്ടായി. ഷക്കീര്ബാബുവും നാല് സുഹൃത്തുക്കളും ചേര്ന്ന് വാള് കാണിച്ച് പ്രജീഷിനെ വീട്ടില് നിന്ന് വിളിച്ചറക്കി കാറില്കയറ്റിക്കൊണ്ടുപോയി മര്ദ്ദിച്ച് അവശനാക്കിയിരുന്നു. അന്ന് പോലീസ് എത്തിയാണ് പ്രജീഷിനെ രക്ഷിച്ചത്. ഈ സംഭവത്തില് ഷക്കീര് ബാബുവിനെ റിമാന്ഡ് ചെയ്തിരുന്നു.
അതിനുശേഷം ജാമ്യത്തിലിറങ്ങിയ ഷക്കീര്ബാബു ജാമ്യ വ്യവസ്ഥകള് തെറ്റിച്ച് പേരയത്ത് എത്തി പ്രജീഷിനെ വീണ്ടും അക്രമിച്ചു. ഈ സംഭവത്തിലും ഇയാളെ റിമാന്ഡ് ചെയ്തു. ജാമ്യവ്യവസ്ഥ തെറ്റിച്ചതിനാല് തുടര്ച്ചയായി മൂന്നുമാസത്തിലധികം ജയിലില് കഴിഞ്ഞ ഷക്കീര്ബാബു ഹൈക്കോടതി മുഖേന ജാമ്യം നേടിയ ശേഷം 23ന് വീണ്ടും പ്രജീഷിനെ ഉപദ്രവിച്ചിരുന്നു.
