വെമ്പായം: മാണിക്കല്‍ ഗ്രാമപഞ്ചായത്തിലെ ജനവാസമേഖലയായ കള്ളിക്കാട് പുതിയ ക്രഷറര്‍ യൂണിറ്റിന് പഞ്ചായത്ത് ലൈസന്‍സ് നല്‍കിയതില്‍ പ്രതിഷേധിച്ച് ബിജെപി മാണിക്കല്‍ പഞ്ചായത്ത് കമ്മറ്റിയുടെ നേതൃത്വത്തില്‍ പഞ്ചായത്ത് ഓഫീസിന് മുന്നില്‍ പ്രതിഷേധസമരം നടത്തി. സംസ്ഥാന ട്രഷറര്‍ ജെ.ആര്‍. പത്മകുമാര്‍ ഉദ്ഘാടനം ചെയ്തു.
നാന്നൂറ്റിഅന്‍പതോളം കുടുംബങ്ങള്‍ തിങ്ങിപാര്‍ക്കുന്ന പ്രദേശത്ത് ക്രഷറര്‍ യൂണിറ്റ് പ്രവര്‍ത്തിക്കുന്നതിന് അനുമതി നല്‍കിയതിന് പിന്നില്‍ അഴിമതിയുണ്ടെന്ന് അദ്ദേഹം ആരോപിച്ചു. ഇതിന് സമീപം ബഡ് സ്‌കൂള്‍ പ്രവര്‍ത്തിക്കുന്നുണ്ട്. രൂക്ഷമായ കുടിവെളളക്ഷാമം നേരിടുന്ന പ്രദേശം കൂടിയാണിവിടം. ഇതൊന്നും പരിശോധിക്കാതെയാണ് പഞ്ചായത്ത് കമ്മറ്റി ലൈസന്‍സ് നല്‍കിയിരിക്കുന്നത്. ഇതിനായി ക്രഷറര്‍ മുതലാളിമാരില്‍ നിന്നും സിപിഎം നേതാക്കളും പഞ്ചായത്ത് ഭരണസമിതിയും വന്‍തുക കൈകൂലി വാങ്ങിയിട്ടുണ്ടെന്നും അദ്ദേഹം ആരോപിച്ചു.
പ്രതിഷേധസമരത്തില്‍ പഞ്ചായത്ത് കമ്മറ്റി പ്രസിഡന്റ് ബി.കെ. ഷിജു അധ്യക്ഷനായിരുന്നു. ബിജെപി നേതാക്കളായ വിജയകുമാര്‍, മുരളീകൃഷ്ണന്‍, അഭിലാഷ് പാറപ്പൊറ്റ, ജയകുമാര്‍, ഉദയകുമാര്‍, പള്ളിപ്പുറം വിനോദ്, ശ്യം കൃഷ്ണ, വൈശാഖ് വിജയ്, പ്രദീപ്, കുതിരകുളം സുരേന്ദ്രന്‍, പ്രഫുലചന്ദ്രന്‍, അജിത്ബാലചന്ദ്രന്‍, പഞ്ചായത്തംഗം വിജയകുമാര്‍ എന്നിവര്‍ നേതൃത്വം നല്‍കി.
