ലണ്ടന്‍: ബിരുദ വിദ്യാഭ്യാസം പൂര്‍ത്തിയാക്കി നൊബേല്‍ സമ്മാന ജേതാവ് മലാല യൂസഫ്‌സായ്. ഫിലോസഫി, പൊളിറ്റിക്സ്, ഇക്കണോമിക്സ് എന്നിവയിലാണ് മലാല ബിരുദം സ്വന്തമാക്കിയത്. ഓക്സ്ഫോര്‍ഡ് സര്‍വകലാശാലയുടെ ലേഡി മാര്‍ഗരറ്റ് ഹാള്‍ കോളേജില്‍ നിന്നാണ് ഈ പാക്കിസ്ഥാനി പെൺകുട്ടി തന്റെ ബിരുദപഠനം പൂർത്തിയാക്കിയത്. കുടുംബാംഗങ്ങള്‍ക്ക് ഒപ്പമുള്ള ആഘോഷ ചിത്രങ്ങള്‍ പങ്കുവച്ചാണ് മലാല യൂസഫ്‌സായി ഈ വിവരം അറിയിച്ചിരിക്കുന്നത്.
ബിരുദം പൂര്‍ത്തിയാക്കിയ സന്തോഷ വാര്‍ത്ത സന്തോഷത്തോടെ നിങ്ങളെ അറിയിക്കുകയാണെന്ന് മലാല ട്വീറ്റ് ചെയ്തു. ‘ഭാവിയില്‍ എന്തുചെയ്യണമെന്നതിനെക്കുറിച്ച് ഇപ്പോള്‍ അറിയില്ല. നെറ്റ്ഫ്‌ളിക്‌സില്‍ ജോയിന്‍ ചെയ്യണം, വായിക്കണം, ഉറങ്ങണം’- മലാല ട്വീറ്റ് ചെയ്തു. 2.6 ലക്ഷം പേരാണ് മലാലയുടെ ട്വീറ്റിന് ലൈക്ക് ചെയ്തത്. 32,000 പേര്‍ റീട്വീറ്റ് ചെയ്തു. നിരവധി പേര്‍ ട്വിറ്ററില്‍ മലാലക്ക് അഭിനന്ദനങ്ങളുമായി രംഗത്തെത്തി.
2012ലാണ് പാകിസ്ഥാനിലെ പെണ്‍കുട്ടികളുടെ വിദ്യാഭ്യാസത്തിന് വേണ്ടി പ്രവര്‍ത്തിച്ച മലാലക്ക് ഭീകരാവാദികളില്‍ നിന്ന് വെടിയേല്‍ക്കുന്നത്. ഗുരുതരമായി പരിക്കേറ്റ മലാല ജീവിതത്തിലേക്ക് തിരിച്ചുവന്നു. പിന്നീട് മലാലയും കുടുംബവും ലണ്ടനിലേക്ക് താമസം മാറി.
മലാലക്ക് നേരെയുണ്ടായ ആക്രമണം ആഗോളതലത്തില്‍ വലിയ ചര്‍ച്ചയായി. 2014ല്‍ സമാധാനത്തിനുള്ള നൊബേല്‍ സമ്മാനം ലഭിച്ചു. ഏറ്റവും പ്രായം കുറഞ്ഞ നോബൽ സമ്മാന ജേതാവാണ് മലാല യൂസഫ്‌സായി.
