പോത്തൻകോട്: അയിരൂപ്പാറ പന്തലക്കോട് വീട്ടിൽ അതിക്രമിച്ചു കയറി വീട്ടമ്മയെ മർദിക്കുകയും വീട്ടുപകരണങ്ങൾ നശിപ്പിക്കുകയും ചെയ്ത സിപിഎം പ്രവർത്തകർ അറസ്റ്റിൽ. സംഭവത്തിലെ പ്രധാന പ്രതി പന്തലക്കോട് വാഴോട്ടു പൊയ്‌ക പ്രശാന്ത് ഹൗസിൽ പ്രസാദ് (30), ഗൂഢാലോചനയ്‌ക്ക് കൂട്ടുനിന്ന ഇടത്തറ പൊയ്‌കയിൽ വീട്ടിൽ പ്രവീൺ (40), സഹോദരൻ ദിലീപ് (42), പന്തലക്കോട് മഞ്ഞപ്പാറ വീട്ടിൽ ഷാജി (48) എന്നിവരെയാണ് വട്ടപ്പാറ പോലീസ് അറസ്റ്റുചെയ്തത്. മൂന്നു പ്രതികൾക്കായി അന്വേഷണം ഊർജിതപ്പെടുത്തിയതായി പോലീസ് അറിയിച്ചു.
ബുധനാഴ്ച വൈകിട്ട് അഞ്ചര മണിയോടെയാണ് സംഭവം. വാഴോട്ട്‌പൊയ്‌ക മുക്കോലക്കൽ പുതുവൽപുത്തൻ വീട്ടിൽ ശ്രീക്കുട്ടന്റെ വീടിനു നേരെയാണ് ആക്രമണം നടന്നത്. ഭാര്യ അശ്വതി (25) നാണ് മർദനമേറ്റത്. ഇക്കഴിഞ്ഞ 5 ന് വീടിനു മുന്നിൽ പ്രവീൺ, ദിലീപ് എന്നിവർ പടക്കമെറിഞ്ഞത് ശ്രീക്കുട്ടൻ ചോദ്യം ചെയ്യുകയും വട്ടപ്പാറ സ്റ്റേഷനിൽ പരാതിയും നൽകി. ബുധനാഴ്ച ഇവരെ സ്റ്റേഷനിലേക്ക് വിളിപ്പിച്ചതാണ് പ്രകോപനത്തിനു കാരണം.
5.30 ഓടെ ഇവരുടെ സുഹൃത്ത് പ്രസാദിന്റെ നേതൃത്വത്തിൽ നാലംഗ സംഘം ശ്രീക്കുട്ടന്റെ വീടിനു നേരെ ആക്രമണം നടത്തുകയായിരുന്നു. പടക്ക് എറിഞ്ഞ് ഭീകരാന്തരീക്ഷം സൃഷ്ടിച്ച ശേഷം വീട്ടിനുള്ളിൽ കടന്ന് ആക്രമണം നടത്തുകയായിരുന്നു. അശ്വതിയെ വയറ്റിൽ ചവിട്ടി താഴെയിട്ടു. കുഞ്ഞിനെ അടിക്കാനായി കമ്പി ഉയർത്തുന്നതു കണ്ട് പ്രസന്ന കരഞ്ഞപേക്ഷിച്ചതിനെ തുടർന്നാണ് അക്രമികൾ പിൻമാറിയത്. തുടർന്ന് വീട്ടുപകരണങ്ങൾ നശിപ്പിക്കുകയും വീടിന്റെ ജന്നൽ ചില്ലുകളും വാതിലും തകർക്കുകയും ചെയ്ത ശേഷമാണ് ഇവർ മടങ്ങിയതെന്ന് അശ്വതി പറഞ്ഞു. വട്ടപ്പാറ സിഐ സി. ബിനുകുമാർ എസ്‌ഐമാരായ ബാബു, സാബത്ത്, എഎസ്‌ഐ ഷാ, സിപിഒമാരായ ഷമീർ, രാജീവ് എന്നിവരടങ്ങുന്ന സംഘമാണ് പ്രതികളെ പിടികൂടിയത്.
