മുക്കം: വെസ്റ്റ് മണാശ്ശേരിയിലെ അനധികൃത ഫ്ളാറ്റ് നിര്മാണത്തിനെതിരെ നാട്ടുകാര് നല്കിയ പരാതിയില് മനുഷ്യാവകാശ കമ്മിഷന് റിപ്പോര്ട്ട് തേടി. ജില്ലാ കലക്ടര്, നഗരസഭ സെക്രട്ടറി എന്നിവരോടാണ് മുപ്പത് ദിവസത്തിനുള്ളില് അന്വേഷണം നടത്തി റിപ്പോര്ട്ട് സമര്പ്പിക്കാന് കമ്മീഷന് അംഗം പി. മോഹനദാസ് ആണ് ആവശ്യപ്പെട്ടത്.
ഫ്ളാറ്റ് നിര്മാണത്തിനെതിരെ നഗരസഭ അടക്കമുള്ളവര്ക്ക് പരാതി നല്കിയിട്ടും നടപടി ഉണ്ടാവാത്തതിനെ തുടര്ന്നാണ് നാട്ടുകാര് മനുഷ്യാവകാശ കമ്മിഷനെ സമീപിച്ചത്. ഗോഡൗണാണെന്ന് പറഞ്ഞാണ് ഫ്ളാറ്റിന്റെ പണി തുടങ്ങിയത്. ഫ്ളാറ്റിന്റെ സെപ്റ്റിക് ടാങ്കുകള് നിര്മിച്ചത് വീടുകളുടെ കിണറിനടുത്താണ്. ഫ്ളാറ്റില് ആളുകള് താമസമാക്കിയാല് മാലിന്യം തള്ളാനുള്ള ഏക മാര്ഗം ഇരുവഴഞ്ഞിപുഴയില് ചെന്ന് ചേരുന്ന തൊട്ടടുത്തുള്ള തോടിലേക്കാണ്.
നൂറുക്കണക്കിന് ലിറ്റര് മലിനജലം ഇത്തരത്തില് വയലില്കൂടി അടുത്തുള്ള തോട്ടിലേക്ക് ഒഴുക്കേണ്ടിവരും. വയലിലെ കൃഷിക്കും ഫ്ളാറ്റ് ഭീഷണിയാണ്. നെല്ല്, വാഴ, പച്ചക്കറികള്, തെങ്ങ് എന്നിവയെല്ലാം ഇവിടെ കൃഷിചെയ്യുന്നുണ്ട്. നേരത്തെ നാട്ടുകാരുടെ പരാതിയില് നഗരസഭ എഞ്ചിനീയര്മാര് പരിശോധന നടത്തിയിരുന്നു. പരിശോധന നടത്തിയ എഞ്ചിനീയര്മാര് കുഴികള് പൂര്വ്വ സ്ഥിതിയിലാക്കുകയും നിയമാനുസൃതമായി മാത്രമേ കുഴികള് എടുക്കുകയുള്ളു എന്ന് രേഖാമൂലം അറിയിക്കുകയും ചെയ്തു.
കൂടാതെ മുനിസിപ്പല് സെക്രട്ടറി നടത്തിയ പരിശോധനയില് വയല് മലിനീകരണവുമായി ബന്ധപ്പെട്ട് നിയമലംഘനം ബോധ്യമായതിനാല് കെട്ടിട ഉടമക്ക് നോട്ടീസും നല്കിയിരുന്നു. ഇത്തരം സംരംഭങ്ങള് തുടങ്ങുമ്പോള് നിയമങ്ങള് പാലിച്ചുകൊണ്ടാവണം എന്നും നോട്ടീസില് പറഞ്ഞിരുന്നു. എന്നാല് ഇതൊന്നും കാര്യമാക്കാതെ കെട്ടിടം പണി തുടരുകയാണെന്നും നാട്ടുകാര് പരാതിപ്പെടുന്നു. നാട്ടുകാര്ക്ക് വേണ്ടി മണാശ്ശേരി പാലിയില് പി. ദിനുവാണ് മനുഷ്യാവകാശ കമ്മീഷന് പരാതി നല്കിയത്.
