കൊച്ചി : പെണ്‍കുട്ടികള്‍ മാത്രം താമസിക്കുന്ന ഫ്‌ലാറ്റില്‍ പുലര്‍ച്ചെ അതിക്രമിച്ചു കയറി യുവതിയെ ലൈംഗികമായി പീഡിപ്പിക്കാന്‍ ശ്രമമെന്ന് പരാതി.എറണാകുളം സൗത്തില്‍ ആണ് ഞെട്ടിക്കുന്ന അതിക്രമം ഉണ്ടായത്. കെഎസ്ആര്‍ടിസി ബസ് സ്റ്റാന്‍ഡിന് സമീപമുള്ള ഫ്‌ലാറ്റില്‍ തിങ്കളാഴ്ച പുലര്‍ച്ചെ നാലരയോടെ ആണ് സംഭവം.
ജോലി ആവശ്യത്തിനായി അഞ്ച് പെണ്‍കുട്ടികള്‍ താമസിച്ചിരുന്ന ഫ്‌ലാറ്റിലാണ് അജ്ഞാതനായ അക്രമി അതിക്രമിച്ച് കയറിയത്.കടവന്ത്ര പൊലീസ് കേസെടുത്ത് അന്വേഷണം ആരംഭിച്ചു.പുലര്‍ച്ചെ ഉറങ്ങിക്കിടന്ന യുവതി ശരീരത്തില്‍ ആരോ സ്പര്‍ശിക്കുന്നതായി തോന്നി പെട്ടെന്ന് ഉണര്‍ന്നപ്പോഴാണ് ഒരാള്‍ തന്റെ ശരീരത്തില്‍ കയറിയിരിക്കുന്നത് കണ്ടത്.പരിഭ്രാന്തിയില്‍ നിലവിളിച്ചതോടെ അക്രമി ഓടി രക്ഷപ്പെട്ടു.
ഫ്‌ലാറ്റിന്റെ പ്രധാന വാതിലും ബാല്‍ക്കണി വാതിലും പൂട്ടാത്ത നിലയിലായിരുന്നുവെന്ന് പൊലീസ് പറഞ്ഞു.ബാല്‍ക്കണി വാതിലിലൂടെയാണ് പ്രതി പുറത്തേക്ക് ഓടിയത്.
സംഭവത്തിന് ശേഷം മുറി പരിശോധിച്ചപ്പോള്‍ തറയില്‍ രക്തക്കറകളും അലമാരകള്‍ തുറന്നിട്ട നിലയിലും കണ്ടെത്തി.എന്നാല്‍ മേശപ്പുറത്ത് ഉണ്ടായിരുന്ന പേഴ്സോ മറ്റ് വിലപിടിപ്പുള്ള സാധനങ്ങളോ അക്രമി എടുത്തിട്ടില്ല. അതിനാല്‍ മോഷണമല്ല, ലൈംഗികാതിക്രമം തന്നെയാണ് പ്രതി ഉദ്ദേശിച്ചിരുന്നതെന്ന് വ്യക്തമാണെന്ന് ഇരയായ യുവതി പരാതിയില്‍ പറയുന്നു.
