വാസ്തുശാസ്ത്രത്തില് ആലയങ്ങളുടെ നിര്മ്മാണപ്രാധാന്യത്തോടോപ്പം അവയുടെ സമീപത്ത് നട്ടുവളര്ത്തേണ്ട വൃക്ഷങ്ങളെക്കുറിച്ചും വ്യക്തമായ സൂചനകളുണ്ട്. ഇപ്രകാരം ഓരോ ദിക്കിലും അനുയോജ്യമായ വൃക്ഷങ്ങളെ വാസ്തുശാസ്ത്രം കല്പിച്ചിട്ടുണ്ട്. വൃക്ഷായുര്വേദപ്രകാരം ഓരോ വൃക്ഷങ്ങളും പ്രത്യേക ദിശകളില് കൂടുതല് സ്വാധീനം ചെലുത്തുന്നുവെന്ന് മനസ്സിലാക്കി വീടുകള്ക്ക് യോജിച്ച നല്ലൊരു അന്തരീക്ഷം ഉണ്ടാക്കാനായി വൃക്ഷങ്ങളെ ദിശാക്രമമനുസരിച്ച് കല്പിച്ചിരിക്കുന്നു.
‘പൂര്വ്വസ്യാം ബകുളോ വടശ്ച…’എന്ന മനുഷ്യാലയ ചന്ദ്രികവചന പ്രകാരവും ‘യാമ്യാദിഷ്വശുഭഫലാ…’ എന്ന ബൃഹത്സംഹിത വചനപ്രകാരവും ഗൃഹഭൂമിയില് കിഴക്ക് ദിക്കില് പൂവിലഞ്ഞി, പേരാല്, പ്ലാവ് എന്നീ മരങ്ങളും തെക്ക് ദിക്കില് അത്തി, പുളി, അടയ്ക്കാമരം തുടങ്ങിയ വൃക്ഷങ്ങളും പടിഞ്ഞാറുവശത്ത് അരയാലും ഏഴിലം പാലയും തെങ്ങും വടക്കുവശത്ത് നാഗമരവും ഇത്തിയും മാവും അമ്പഴവും നില്ക്കുന്നത് ശുഭകരമാണ്.
ഓരോ വൃക്ഷത്തിന്റെയും വിപരീതദിശാസ്വാധീനവും ദോഷഫലങ്ങളും വ്യക്തമായി പ്രമാണ ഗ്രന്ഥങ്ങളില് രേഖപ്പെടുത്തിയിരിക്കുന്നുവെന്നതിലൂടെ നിശ്ചയിക്കപ്പെട്ട വൃക്ഷങ്ങളുടെ ദിശാ പ്രാധാന്യം ശ്രദ്ധേയമാകുന്നു. എന്നാല് പ്ലാവും, കമുകും തെങ്ങും മാവും വിശേഷദിക്കുകളില് ശ്രേഷ്ഠമെങ്കിലും മറ്റു ദിക്കുകളിലും ശോഭനമായവയാണ്.
ഇതുകൂടാതെ കുമിഴ്, കൂവളം, കടുക്ക, കൊന്ന, നെല്ലി, ദേവതാരം, പ്ലാശ്, അശോകം, ചന്ദനം, പുന്ന, വേങ്ങ, ചെമ്പകം, കരിങ്ങാലി, നെന്മേനി വാക, ഞാഴല് എന്നീ വൃക്ഷങ്ങള് ഗൃഹത്തിന്റെ നേര്വശം ഒഴിച്ച് പുറകിലും വശങ്ങളിലും നട്ടുപിടിപ്പിക്കാവുന്നതാണ്. അതുപോലെതന്നെ വാഴ, പിച്ചകം, തുളസി, വെറ്റിലക്കൊടി തുടങ്ങിയവ ഏത് ദിക്കിലും ശുഭദായകം തന്നെ. എന്നാല് വൃക്ഷരോപണ സമയത്തു പ്രധാന വാതിലിനു നേര്ക്ക് വേധം വരാത്ത വിധം ശ്രദ്ധിക്കണം.
എന്നാല് കാഞ്ഞിരം, ചേര്, വയ്യങ്കതവ്, നറുവരി, താന്നി, ഉകം, കള്ളിപ്പാല, പിശാചവൃക്ഷം, സ്വര്ണ്ണക്ഷീരി, മുരിങ്ങ, മുരിക്ക് എന്നിവ ഗൃഹസമീപത്ത് വര്ജ്യങ്ങളാകുന്നു.
‘സുവര്ണാത്മകാശ്ഛേദ്യാ മന്ദിരസ്തരൂച്ച യുഗസീമാഭ്യന്തരസ്ഥാ..’ എന്നുള്ള പ്രമാണപ്രകാരം സ്വര്ണ്ണമയമായ വൃക്ഷം ആയിരുന്നാലും ഗൃഹത്തിന്റ മുകളിലേക്ക് വളര്ന്നാല് മുറിച്ചു നീക്കണം എന്ന കല്പിക്കപ്പെട്ടിരിക്കുന്നുവെന്നതിനാല് എല്ലാത്തരം വൃക്ഷങ്ങള്ക്കും ഗൃഹത്തിന്റെ അതിസാമീപ്യം വര്ജിക്കണം.
അന്തഃസാരസര്വ്വസാരബഹിസ്സാരനിസ്സാര വൃക്ഷങ്ങള്ക്ക് യഥാക്രമത്തില് പുരയിടങ്ങളില് ഗൃഹസാമീപ്യം കല്പ്പിച്ചു കൊള്ളണം. പ്ലാവ് തുടങ്ങിയ ഉള്ളില് ബലമുള്ളവയാണ് അന്തസ്സാര വൃക്ഷങ്ങള്. പുളി, തേക്ക് തുടങ്ങിയ ഉള്ളിലും പുറത്തും ബലമുള്ള വൃക്ഷങ്ങളാണ് സര്വസാര വൃക്ഷങ്ങള്. പന, തെങ്ങ് കവുങ്ങ് തുടങ്ങിയവ പുറത്തു ബലമുള്ളവ ബഹിസ്സാരങ്ങളാണ്. മുരിങ്ങ, ശീമപ്ലാവ് തുടങ്ങിയവ ഒട്ടും ബലമില്ലാത്ത നിസ്സാരവൃക്ഷങ്ങളാണ്.
വൃക്ഷങ്ങളുമായി വളരെ ചേര്ന്നു നിന്നിരുന്ന ഒരു ജീവിതശൈലിയാണ് പൊതുവെ മനുഷ്യര്ക്കുണ്ടായിരുന്നത്. വീടിനു ചുറ്റും നിന്നിരുന്ന വൃക്ഷങ്ങള് ഭക്ഷണമായും ഔഷധമായും ജീവനവ്യവസ്ഥയെ സ്വാധീനിച്ചിരുന്നു. അതുകൊണ്ടു തന്നെ നക്ഷത്രവൃക്ഷകല്പനയും ഉപവനസങ്കല്പവും മനുഷ്യജീവനത്തിന് വളരെ യുക്തം തന്നെ.
ഡോ. രാധാകൃഷ്ണന് ശിവന്
