ന്യൂദല്ഹി: സൈനികരുടെ വിരമിക്കല് പ്രായം നീട്ടുന്ന കാര്യം ആലോചനയിലാണെന്നും മൂന്ന് സായുധ സേനയിലെയും 15 ലക്ഷത്തോളം വരുന്ന സൈനികര്ക്ക് ഇത് പ്രയോജനപ്പെടുമെന്നും സംയുക്ത സൈനിക മേധാവി ജനറല് ബിപിന് റാവത്ത്. ട്രിബ്യൂണിനു നല്കിയ അഭിമുഖത്തിലാണ് ജനറല് ബിപിന് റാവത്ത് ഇക്കാര്യം അറിയിച്ചത്.
എന്തുകൊണ്ടാണ് കരസേനയിലെയും വ്യോമസേനയിലെയും നാവികസേനയിലെയും ഒരു ജവാന് വെറും പതിനഞ്ചോ പതിനേഴോ വര്ഷം മാത്രം സേവിച്ചാല് മതിയെന്നത് തുടരുന്നത്. എന്തുകൊണ്ട് 30 വര്ഷം സേവിച്ചു കൂടാ. ഇങ്ങനെ ചെയ്യുന്നതിലൂടെ പരിശീലനം ലഭിച്ച മനുഷ്യ വിഭവശേഷിയാണ് നഷ്ടപ്പെടുത്തുന്നത്.
സായുധ സേനയില് പരിവര്ത്തനവും പുനഃസംഘടനയും ആവശ്യമാണെന്നും സൈനികരുടെ സര്വ്വീസ് കാലാവധി നീട്ടാനുള്ള നയം താമസിയാതെ കൊണ്ടുവരുമെന്നും ജനറല് ബിപിന് റാവത്ത് വ്യക്തമാക്കി.
