ന്യൂദല്ഹി : ഐക്യരാഷ്ട്ര സഭയുടെ മാര്ഗ്ഗ നിര്ദ്ദേശങ്ങളൊന്നും പാക്കിസ്ഥാനില് നടപ്പാക്കുന്നില്ല; പാക് അധിനിവേശ കശ്മീരില് കടുത്ത മനുഷ്യാവകാശ ലംഘനം നടക്കുന്നതായി രൂക്ഷ വിമര്ശനം. പാക് അധിനിവേശ കശ്മീര് സംഘടനാ നേതാവ് ഷാബിര് ചൗധരി ബ്രിട്ടീഷ് എംപിമാര്ക്ക് നല്കിയ പരാതിയിലാണ് ഇക്കാര്യം വ്യക്തമാക്കിയത്. ജമ്മുകശ്മീരിനെക്കുറിച്ച് നിരവധി പുസ്തകങ്ങളും ലേഖനങ്ങളും എഴുതിയിട്ടുള്ള സാമൂഹ്യ പ്രവര്ത്തകനും ഗവേഷകനുമാണ് ഡോ. ഷാബിര്.
ബ്രീട്ടീഷ് പാര്ലമെന്റംഗവും പ്രതിപക്ഷ നേതാവുമായ കീര് സ്റ്റാര്മെറിനാണ് പരാതി നല്കിയിരിക്കുന്നത്. അന്താരാഷ്ട്രവേദികളില് പാക്കിസ്ഥാന്റെ കടുത്ത മനുഷ്യാവകാശ ലംഘനത്തിനെതിരായി നടക്കുന്ന ഏറ്റവും ശക്തമായ നീക്കമായാണ് ഷാബിറിന്റെ നടപടിയെ ബ്രിട്ടീഷ് മാധ്യമങ്ങള് കാണുന്നത്.
കശ്മീരിനെ സംബന്ധിച്ച് ഐക്യരാഷ്ട്ര സഭ മുന്നോട്ടുവച്ച ഒരു നിര്ദ്ദേശങ്ങളും പാക്കിസ്ഥാന് അനുസരിക്കുന്നില്ലെന്നാണ് പരാതി ഉയരുന്നത്. പാക് അധീന കശ്മീരിലെ പാക്കിസ്ഥാന്റെ ഭാഗമല്ലാത്ത മേഖലകളില് നിന്നും ഇതുവരെ സൈന്യത്തെ പിന്വലിക്കാന് പാക്കിസ്ഥാന് തയ്യാറായിട്ടില്ല. മാത്രമല്ല ജിഹാദി ഇസ്ലാമിക ഭീകരന്മാരുടെ സേനകളെ അവിടെ പരിശീലനം കൊടുത്ത് താമസിപ്പിച്ചിരിക്കുകയാണ്.
പ്രദേശത്തെ സമാധാനാന്തരീക്ഷം തകര്ക്കാനും പാക്കിസ്ഥാനില് നിന്നുകൊണ്ട് ഇന്ത്യക്കെതിരെ ആക്രമണം നടത്താതെ മറ്റൊരു പ്രദേശത്തുനിന്നും സൗകര്യപൂര്വ്വം അയല്രാജ്യത്തെ ആക്രമിക്കുന്ന തന്ത്രമാണ് പാക്കിസ്ഥാന് നടത്തുന്നത്. ഇത് ഐക്യരാഷ്ട്ര സഭയുടെ നിര്ദ്ദേശങ്ങള്ക്ക് എതിരാണെന്നും ചൗധരി ചൂണ്ടിക്കാട്ടി.
കശ്മീരിലെ സമാധാനശ്രമങ്ങള്ക്ക് ഇന്ത്യയും പാക്കിസ്ഥാനും ചേര്ന്ന് എടുക്കേണ്ട നയങ്ങളാണെന്ന ബ്രിട്ടന് നേരത്തെ അറിയിച്ചിരുന്നു. ഇതിന് സംഘടനയുടെ ഭാഗത്തുനിന്നുള്ള മറുപടി എന്ന നിലയിലാണ് പാക്കിസ്ഥാന്റെ നടപടികള് തടസ്സമാണ്. ഐക്യാരാഷ്ട്രസഭയുടെ ഇടപെടലിന് ബ്രിട്ടന്റെ സഹായം ആവശ്യമാണെന്നും ഷാബിര് ആവശ്യപ്പെട്ടു. ബ്രിട്ടീഷ് പാര്ലമെന്റിലെ ചില എംപിമാര് പാക്കിസ്ഥാന് വേണ്ടി വാദിക്കുകയാണെന്നും അവര് അക്രമത്തെ പ്രോത്സാഹിപ്പിക്കുകയാണെന്നും ഷാബിര് പരാതിയില് കൂട്ടിച്ചേര്ത്തു.
