ന്യൂദല്‍ഹി : ഇന്ത്യന്‍ നാവിക സേനാ മുന്‍ ഉദ്യോഗസ്ഥന്‍ കുല്ഭൂഷണ് ജാദവിന്റെ മോചനത്തിനായി ദേശീയ ഉപദേഷ്ടാവ് അജിത് ദോവല്‍ സമ്മര്‍ദ്ദം ചെലുത്തുന്നുണ്ടെന്ന് മുതിര്‍ന്ന അഭിഭാഷകന്‍ ഹരീഷ് സാല്‍വേ. പാക് സൈന്യത്തിന്റെ കസ്റ്റഡിയില്‍ വെച്ചു നല്‍കിയ കുറ്റസമ്മത മൊഴിയല്ലാതെ ജാദവിനെതിരെ പാക്കിസ്ഥാന്റെ കൈയ്യില്‍ മറ്റു തെളിവുകള്‍ ഒന്നുമില്ല. അതിനാല്‍ കുല്‍ഭൂഷണിനെ മോചിപ്പിക്കുകയല്ലാതെ പാക്കിസ്ഥാന് ഒന്നും ചെയ്യാന്‍ സാധിക്കില്ലെന്നും ഹരീഷ് സാല്‍വേ പറഞ്ഞു.
ഹേഗിലെ അന്താരാഷ്‌ട്ര കോടതിയില്‍ ഇന്ത്യയ്‌ക്കുവേണ്ടി ഹാജരായത് ഹരീഷ് സാല്‍വേയാണ്. വെറും ഒരു രൂപ പ്രതിഫലത്തിലാണ് കുല്‍ഭൂഷണിന് വേണ്ടി അദ്ദേഹം കേസ് ഏറ്റെടുത്തത്. അഭിമാനപ്രശ്നമായതിനാല്‍ മാനുഷിക പരിഗണനയുടെ പേരുപറഞ്ഞായിരിക്കും പാക്കിസ്ഥാന് കുല്‍ഭൂഷണിനെ മോചിപ്പിക്കുക. അത് എന്തുതന്നെയായാലും കുല്‍ഭൂഷണിന്റെ മോചനമാണ് ഇന്ത്യയുടെ ലക്ഷ്യമെന്നും ഹരീഷ് സാല്‍വേ വ്യക്തമാക്കി.
കുല്‍ഭൂഷണിന് നയതന്ത്ര സഹായം ലഭ്യമാക്കാന്‍ അന്താരാഷ്‌ട്ര നീതിന്യായ കോടതി ഉത്തരിവിട്ടതിനു പിന്നാലെ കുല്‍ഭൂഷണെതിരായ തെളിവുകളും പാക് പട്ടാളക്കോടതിയുടെ വിധിപ്പകര്‍പ്പും നല്‍കാന്‍ ഇന്ത്യ ആവശ്യപ്പെട്ട് കഴിഞ്ഞതായും അദ്ദേഹം കൂ്ട്ടിച്ചേര്‍ത്തു.
വധശിക്ഷയ്‌ക്കു ഉത്തരവിട്ട പാക് കോടതിയുടെ നടപടികള്‍ കഴിഞ്ഞ വര്‍ഷം ജൂലായില്‍ അന്താരാഷ്‌ട്ര നീതിന്യായ കോടതി സ്റ്റേ ചെയ്തിരുന്നു. കുല്ഭൂഷണ് നയതന്ത്ര സഹായം ലഭ്യമാക്കാന്‍ അനുവദിച്ചുകൊണ്ട് ഉത്തരവിടുകയും ചെയ്തിരുന്നു. കൂടാതെ കുല്‍ഭൂഷണിന് നയതന്ത്ര സഹായം ലഭ്യമാക്കാന്‍ അനുവദിക്കാതിരുന്നത് വിയന്ന കരാറിന്റെ ലംഘനമാണെന്നും അന്താരാഷ്‌ട്രക്കോടതി പാക്കിസ്ഥാനെ രൂക്ഷമായി വിമര്‍ശിച്ചിരുന്നു.
