തിരുവനന്തപുരം: മുസ്ലീം ലീഗ് എംഎല്എ കെ.എം. ഷാജിക്കെതിരേ വിജിലന്സ് കേസെടുക്കുന്നു. അഴീക്കോട് ഹയര് സെക്കന്ററി സ്കൂളിന് പ്ലസ് ടു അനുവദിച്ചതുമായി ബന്ധപ്പെട്ട് ഷാജി 25 ലക്ഷം രൂപ കൈപ്പറ്റിയെന്ന പരാതിയിലാണ് അഴീക്കോട് എം.എല്.എ കൂടിയായി കെ.എം ഷാജിക്കെതിരേ വിജിലന്സ് കേസ് എടുക്കുക. മുഖ്യമന്ത്രി പിണറായി വിജയനെതിരേ രൂക്ഷമായ വിമര്ശനവുമായി ഷാജി രംഗത്തെത്തിയിരുന്നു. പൊതുജനങ്ങളുടെ പണം കൊലയാളികളെ രക്ഷിക്കാന് പിണറായി സര്ക്കാര് ചെലവഴിക്കുന്നു എന്നായിരുന്നു ഷാജിയുടെ ആരോപണം. ഇതിനു ഷാജിക്ക് രൂക്ഷമായ ഭാഷയില് മുഖ്യമന്ത്രി മറുപടി നല്കിയിരുന്നു. ഷാജിക്ക് വികൃതമനസാണെന്നായിന്നു പിണറായി ആരോപിച്ചത്. ഇതിനു തൊട്ടുപിന്നാലെയാണ് ഇപ്പോള് ഷാജിക്കെതിരേ വിജിലന്സ് കേസെടുക്കാന് തീരുമാനിച്ചത്. 2019 നവംബറിലാണ് കേസെടുക്കാന് വിജിലന്സ് ശുപാര്ശ ചെയ്തത്. എന്നാല്, ഇതില് ഇതുവരെ സര്ക്കാര് തീരുമാനം എടുത്തിരുന്നില്ല. എന്നാല്, മുഖ്യമന്ത്രിയെ വിമര്ശിച്ചതിനു പിന്നാലെ കേസെടുക്കാന് വിജിലന്സിന് ഉത്തരവ് നല്കുകായായിരുന്നു.
കഴിഞ്ഞ യു.ഡി.എഫ് സര്ക്കാറിന്റെ കാലത്ത് ഹയര്സെക്കന്ററി കോഴ്സ് അനുവദിക്കുന്നതിനായി പൂതപ്പാറ ശാഖാ കമ്മിറ്റിയെ അഴീക്കോട് ഹൈസ്കൂള് കമ്മിറ്റി സമീപിച്ചിരുന്നു. തുടര്ന്ന് നടത്തിയ ചര്ച്ചയില് പ്ലസ് ടു അനുവദിച്ചാല് പൂതപ്പാറ ആസ്ഥാനമായി ലീഗ് ഓഫീസിന്റെ കെട്ടിടം വയ്ക്കുന്ന ചിലവിലേക്ക് ഒരു തസ്തികയ്ക്കു സമാനമായ തുക നല്കാമെന്ന് ഹൈസ്കൂള് കമ്മിറ്റി ഉറപ്പു നല്കുകയും ചെയ്തിരുന്നെന്ന് പൂതപ്പാറയിലെ ലീഗ് നേതാക്കള് നേരത്തേ നല്കിയ പരാതിയില് പറയുന്നു.
2014ല് അഴീക്കോട് ഹൈസ്കൂളിന് പ്ലസ് ടു അനുവദിച്ചു കിട്ടിയതിനു പിന്നാലെ വാഗ്ദാന പ്രകാരമുള്ള 25 ലക്ഷം രൂപ പ്രാദേശിക കമ്മിറ്റിയ്ക്കു നല്കുവാന് സ്കൂള് മാനേജ്മെന്റ് തീരുമാനിച്ചു. എന്നാല് കെ.എം ഷാജി ഇടപെട്ട് ഈ തുക ഇപ്പോള് നല്കേണ്ടതില്ലെന്നും തന്നോട് ചര്ച്ച ചെയ്തശേഷം ഇതുമായി ബന്ധപ്പെട്ട കാര്യം ചെയ്താല് മതിയെന്നും മാനേജറോട് നിര്ദേശിച്ചതിനെ തുടര്ന്ന് തുക തരാന് കഴിയില്ല എന്ന് മാനേജര് തങ്ങളെ അറിയിച്ചെന്നുമാണ് പൂതപ്പാറ പഞ്ചായത്ത് കമ്മിറ്റി ആരോപിക്കുന്നത്.
തുടര്ന്ന് പ്രാദേശിക മുസ്ലിം ലീഗ് നേതാക്കള് എം.എല്.എയുമായി സംസാരിച്ചപ്പോള് അഴീക്കോട് ഹൈസ്കൂള് കമ്മിറ്റിയില് വിവിധ വിഭാഗത്തില് പെട്ടവര് ഉള്ളതിനാല് അവിടെ നിന്നും പൈസ വാങ്ങരുതെന്നാണ് നിര്ദേശമെന്ന് പറഞ്ഞു. ഇതേത്തുടര്ന്ന് പ്രാദേശിക കമ്മിറ്റി ഇതില് നിന്നും പിന്മാറിയെന്നും പരാതിയില് വിശദീകരിക്കുന്നു. എന്നാല് 2017 ജൂണില് സ്കൂള് കമ്മിറ്റി ജനറല് ബോഡിയില് പ്ലസ് ടു അനുവദിക്കലുമായി ബന്ധപ്പെട്ട് ചിലവാക്കിയ ഭീമമായ തുകയുടെ കണക്ക് വന്നതിന്റെ അടിസ്ഥാനത്തില് നടത്തിയ അന്വേഷണത്തില് മണ്ഡലം എം.എല്.എ കെ.എം ഷാജി 25 ലക്ഷം രൂപ മാനേജറില് നിന്നും നേരിട്ട് കൈപ്പറ്റിയതായി ബോധ്യപ്പെട്ടിട്ടുണ്ടെന്നായിരുന്നു പരാതി.
