തിരുവനന്തപുരം: കൊറോണക്കെതിരായ പോരാട്ടത്തില് ഒറ്റക്കല്ല, രാജ്യത്തെ 130 കോടി ജനങ്ങളും ഒപ്പമുണ്ടെന്ന് ഓര്മ്മപ്പെടുത്താന് ഞായറാഴ്ച(ഏപ്രില് അഞ്ച്) രാത്രി ഒമ്പത് മണിക്ക് ദീപം തെളിയിക്കണമെന്ന് പ്രഖ്യാപിച്ച പ്രധാനമന്ത്രി നരേന്ദ്ര മോദിയുടെ നിര്ദ്ദേശത്തെ പിന്തുണച്ച് സംവിധായകനും നടനുമായ ജോയ് മാത്യു. ഫെയ്സ്ബുക്ക് ലൈവിലൂടെയാണ് അദ്ദേഹം തന്റെ പിന്തുണ അറിയിച്ചത്.
ഇന്ത്യയിലൊട്ടാകെ ദീപം തെളിയിച്ചാല് കൊറോണ രാജ്യത്ത് നിന്ന് മാറി പോകില്ലെന്ന് നമ്മളെ പോലെ തന്നെ പ്രധാനമന്ത്രിക്കും അറിയാം. എന്നാല് കൊറോണ ബാധിച്ച് ഒറ്റപ്പെട്ട് പോയവരുണ്ട്. ക്വാറന്റൈനില് നിരീക്ഷണത്തില് കഴിയുന്നവരും കൊറോണ പിടിപ്പെടുമോ എന്ന് ആശങ്കപ്പെടുന്നവരും നമ്മുടെ സമൂഹത്തില് ഉണ്ട്. ഇവരാരും ഒറ്റക്കല്ലെന്നും രാജ്യം മുഴുവന് അവര്ക്കൊപ്പമുണ്ടെന്ന് കാണിക്കാനും അതിലൂടെ അവരുടെ മനസ്സിന് ശക്തി പകരാനുമാണ് പ്രധാനമന്ത്രിയുടെ പ്രഖ്യാപനമെന്ന് ജോയ് മാത്യു വ്യക്തമാക്കുന്നു.
