ഹിഗഷിമറ്റ്സുഷിമ (ജപ്പാന്): ഏതന്സില് നിന്നെത്തിയ ഒളിമ്പിക്സ് ദീപശിഖയ്ക്ക് ജപ്പാന് ഇന്നലെ സ്വീകരണം നല്കി. ആഘോഷമായി നടത്തേണ്ട സ്വീകരണ ചടങ്ങ് കൊറോണയുടെ പശ്ചാത്തലത്തില് പേരിന് മാത്രമായി ചുരുക്കിയിരുന്നു. നിശ്ചിത സമയത്ത് തന്നെ ടോക്കിയോ ഒളിമ്പിക്സ് നടക്കുമോയെന്ന സംശയം ഇപ്പോഴും നിലനില്ക്കുന്നുണ്ട്.
മിയാഗി പ്രോവിന്സിലെ മത്സുഷിമ വിമാനത്താവളത്തിലേക്കാണ് ഏതന്സില് നിന്ന് ഒളിമ്പിക്സ് ദീപശിഖയും വഹിച്ചുകൊണ്ടുള്ള പ്രത്യേക വിമാനം എത്തിയത്. ജാപ്പനീസ് മുന് ഒളിമ്പ്യന്മാരായ സവോരി യോഷിഡയും തതാഹിറോ നോമൂറയും ചേര്ന്ന് ദീപശിഖ ഏറ്റുവാങ്ങി. ക്ഷണിക്കപ്പെട്ട അതിഥികള് മാത്രമാണ് ചടങ്ങില് പങ്കെടുത്തത്.
നേരത്തെ നിശ്ചയിച്ചതനുസരിച്ച് 200 കുട്ടികള് ഒളിമ്പിക്സ് ദീപശിഖയെ സ്വീകരിക്കാന് എത്തേണ്ടതായിരുന്നു. എന്നാല് കൊറോണ ഭീതിയില് കുട്ടികളെ ചടങ്ങില് നിന്ന് ഒഴിവാക്കി. കൊറോണ വൈറസ് ബാധയില് ലോകത്ത് ഇതുവരെ പതിനായിരത്തിലേറെ പേര് മരിച്ചു.
ഫുകുഷിമയിലെ ജെ- വില്ലേജ് സ്പോര്ട്സ് കോപ്ലക്സില് നിന്ന് ഈമാസം 26 ന് ഒളിമ്പിക് ദീപശിഖ പ്രയാണം ആരംഭിക്കും. ഒളിമ്പിക്സിന് മുന്നോടിയായുള്ള വമ്പന് പരിപാടിയാണ് ദീപശിഖാ പ്രയാണം. ഞങ്ങള്ക്ക് അത് പരമപ്രധാനമാണ്. എന്ത് വിലകൊടുത്തും ദീപശിഖ പ്രയാണം നടത്തുമെന്ന് ടോക്കിയോ ഒളിമ്പിക്സ് സി.ഇ.ഒ തോഷിരോ മൂട്ടോ പറഞ്ഞു.
റോഡ് അരികില് നിന്ന് ദീപശിഖ പ്രയാണം വീക്ഷിക്കുന്നതിന് കാണികള്ക്ക് അനുമതി നല്കിയിട്ടുണ്ട്. കൂട്ടം കൂടരുതെന്ന മുന്നറിയിപ്പും നല്കി. ജപ്പാന്റെ എല്ലാ ഭാഗത്തും ദീപശിഖ എത്തും. 121 ദിവസം നീളുന്ന പ്രയാണത്തിനുശേഷം ദീപശിഖ ടോക്കിയോയില് എത്തിച്ചേരും. ജൂലൈ 24 ന് ഒളിമ്പിക്സ് ആരംഭിക്കും.
അതിനിടെ കൊവിഡ് -19 വൈറസിന്റെ പശ്ചാത്തലത്തില് ടോക്കിയേ ഒളിമ്പിക്സ് മാറ്റവയ്ക്കണമെന്ന ആവശ്യവും ഉയരുന്നുണ്ട്. ജപ്പാന് ഒളിമ്പിക് കമ്മിറ്റി അംഗം കാവോരി യാമാഗുച്ചി ഒളിമ്പികസ് മാറ്റിവയ്ക്കുന്നതാണ് നല്ലതെന്ന് ഒരു പത്രത്തിന് നല്കിയ അഭിമുഖത്തില് പറഞ്ഞു.
നിലിവലെ സാഹചര്യത്തില് കായിക താരങ്ങള്ക്ക് നല്ലതുപോലെ തയ്യാറെടുക്കാനാകില്ല. അതിനാല് ഒളിമ്പിക്സ് മാറ്റിവയ്ക്കണമെന്ന് യാമാഗൂച്ചി പറഞ്ഞു. ഒളിമ്പിക്സ് മാറ്റിവയ്ക്കണമെന്ന ലോക അത്ലറ്റിക് ഫെഡറേഷന് തലവന് സെബാസ്റ്റിയന് കോയും ആവശ്യപ്പെട്ടിരുന്നു.അതേസമയം ഒളിമ്പിക്സിന് നാലരമാസം കൂടിയുള്ള സാഹചര്യത്തില് ഒളിമ്പിക്സ് മാറ്റിവയ്ക്കേണ്ട ആവശ്യമില്ലെന്ന് ഇന്റര്നാഷണല് ഒളിമ്പിക് കമ്മിറ്റി തലവന് തോമസ് ബാക്ക് ന്യൂയോര്ക്ക് ടൈംസിന് നല്കിയ അഭിമുഖത്തില് പറഞ്ഞു.
