കൊച്ചി: പ്രധാനമന്ത്രി നരേന്ദ്രമോദി ജനതാകർഫ്യൂവിന് ആഹ്വാനം ചെയ്ത ഞായറാഴ്ച സ്വകാര്യ ബസുകൾ നിരത്തിലിറങ്ങില്ല. അന്നേദിവസം സ്വകാര്യ ബസുകളുടെ സർവീസ് നിർത്തിവയ്‌ക്കാൻ പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ തീരുമാനിച്ചു. കോഴിക്കോട് ചേർന്ന യോഗമാണ് ജനതാകർഫ്യൂവിന് ഐക്യദാർഢ്യം പ്രഖ്യാപിച്ചത്.
കോവിഡ് ബാധ റിപ്പോർട്ട് ചെയ്യപ്പെട്ട ശേഷം സംസ്ഥാനത്തെ പൊതുഗതാഗത സംവിധാനങ്ങളിൽ യാത്രക്കാരുടെ വലിയ കുറവാണ് അനുഭവപ്പെടുന്നത്. ജനതാകർഫ്യൂവിന് പിന്തുണ പ്രഖ്യാപിച്ച് കോട്ടയം ജില്ലയിലെ പമ്പുകൾ തുറക്കില്ലെന്ന് പമ്പുടമകളും അറിയിച്ചിട്ടുണ്ട്. മൂന്ന് ഓയിൽ കമ്പനികളുടേതായി ജില്ലയിൽ പ്രവർത്തിക്കുന്ന 155 പമ്പുകൾ ഞായറാഴ്ച പ്രവർത്തിക്കില്ല.
രാവിലെ ഏഴ് മണിമുതൽ വൈകിട്ട് ഒൻപത് മണിവരെ വീടുകളിൽ നിന്ന് പുറത്തിറങ്ങരുതെന്നാണ് ജനങ്ങളോട് പ്രധാനമന്ത്രി അഭ്യർത്ഥിച്ചിരിക്കുന്നത്. കൊറോണയുടെ പശ്ചാത്തലത്തിൽ വ്യാഴാഴ്ച രാത്രി രാജ്യത്തെ അഭിസംബോധന ചെയ്തു സംസാരിക്കുമ്പോഴാണ് പ്രധാനമന്ത്രി ജനതാ കർഫ്യു പ്രഖ്യാപിച്ചത്.
കൊറോണ മൂലം ഇന്ത്യയ്‌ക്ക് ഒന്നും സംഭവിക്കില്ലെന്ന പ്രചാരണങ്ങൾ തെറ്റാണ്. ലോകം മുഴുവനുമുള്ള മനുഷ്യർ പ്രതിസന്ധിയിലാണ്. ഒന്നാം ലോക മഹായുദ്ധവും രണ്ടാം ലോക മഹായുദ്ധവും ബാധിച്ച രാജ്യങ്ങളേക്കാൾ അധികമാണ് കൊറോണ ബാധിച്ച രാജ്യങ്ങളുടെ എണ്ണമെന്ന് പ്രധാനമന്ത്രി പറഞ്ഞു.
