മുംബൈ: തന്റെ അമ്മയാണെന്ന അവകാശവാദവുമായി മലയാളി യുവതി രംഗത്തെത്തിയതില് പ്രതികരണവുമായി പ്രശസ്ത ബോളിവുഡ് ഗായിക അനുരാധ പഡ്വാള്.തനിക്ക് അങ്ങനെ ഒരു മകളില്ല. ഇത്തരം വിഡ്ഢിത്തരത്തോട് പ്രതികരിക്കാനില്ല. തനിക്ക് ഒരു നിലവാരമുണ്ട്. അതുകൊണ്ടുതന്നെ ഇത്തരം വിഷയങ്ങളില് വലിച്ചഴിയ്ക്കാനോ കൂടുതല് പ്രതികരിക്കാനോ ഇല്ലെന്നും അനുരാധ.
തിരുവനന്തപുരത്ത് താമസിക്കുന്ന കര്മ്മല മോഡെക്സ് എന്ന യുവതിയാണ് മാതൃത്വം അംഗീകരിക്കണമെന്ന ആവശ്യവുമായി ജില്ലാ കുടുംബ കോടതിയെ സമീപിച്ചത്. യുവതിയുടെ ഹര്ജി പ്രകാരം 1969 വിവാഹിതരായ അനുരാധക്കും അരുണ് പഡ്വാളിനും 1974ലാണ് കര്മ്മല ജനിക്കുന്നത്. സംഗീതജീവിതത്തിലെ തിരക്കുകള് കാരണം വേണ്ട ശ്രദ്ധ നല്കാന് സാധിക്കാതെ വന്നതോടെ കുഞ്ഞിനെ കുടുംബസുഹൃത്തായ പൊന്നച്ചന് ആഗ്നസ് ദമ്പതികളെ ഏല്പ്പിക്കുകയായിരുന്നു. എന്നാല്, സൈനികനായിരുന്ന പൊന്നച്ചന് തന്റെ സ്വദേശമായ തിരുവനന്തപുരത്തേക്ക് സ്ഥലം മാറുന്നതിനെ തുടര്ന്ന് കുഞ്ഞിനെ തിരികെ കൊണ്ടുപോകാന് അനുരാധയും ഭര്ത്താവും വന്നെങ്ങിലും കുട്ടി അവര്ക്കൊപ്പം പോകാന് തയ്യാറാവാത്തതിനാല് മടങ്ങുകയായിരുന്നുവെന്നും യുവതി പറയുന്നു.
പൊന്നച്ചന്റെയും ആഗ്നസിന്റെയും മൂന്ന് മക്കള്ക്കൊപ്പമാണ് താന് വളര്ന്നത്. പൊന്നച്ചന് സാമ്പത്തിക ബുദ്ധിമുട്ടുകള് നേരിട്ടതിനാല് 10ാം ക്ലാസിനു ശേഷം തനിക്ക് പഠനം തുടരാന് സാധിച്ചില്ല. മൂന്ന് വര്ഷങ്ങള്ക്കു മുമ്പ് മരണക്കിടക്കയില് വച്ചാണ് പൊന്നച്ചന് ഇക്കാര്യം തന്നോടു വെളിപ്പെടുത്തിയതെന്നും യുവതി ഹര്ജിയില് വ്യക്തമാക്കി.
എന്നാല്, അന്നു മുതല് അനുരാധയെ കാണാന് ശ്രമിച്ചെങ്കിലും പ്രായപൂര്ത്തിയായ മറ്റു രണ്ടു മക്കള് അനുവദിക്കില്ലെന്നായിരുന്നു ഗായികയുടെ പ്രതികരണമെന്ന് കര്മ്മല പറഞ്ഞു. തനിക്കു ലഭിക്കേണ്ട മാതൃത്വവും ബാല്യ കൗമാര കാലങ്ങളിലെ പരിചരണവും നിഷേധിച്ചതിനാല് 50 കോടി രൂപ നഷ്ട പരിഹാരം നല്കണമെന്നാണ് കര്മ്മലയുടെ ആവശ്യം. വിഷയവുമായി ബന്ധപ്പെട്ട് അനുരാധയ്ക്ക് വക്കീല് നോട്ടിസ് അയച്ചിട്ടുണ്ടെന്നും മക്കളായ ആദിത്യ പഡ്വാള്, കവിത പഡ്വാള് എന്നിവര്ക്കൊപ്പം ജനുവരി 27ന് കോടതിയില് ഹാജരാകാന് ആവശ്യപ്പെട്ടിട്ടുണ്ടെന്നും കര്മ്മലയുടെ അഭിഭാഷകന് വ്യക്തമാക്കി.
