തിരുവനന്തപുരം: കേരളത്തിനെതിരായ രഞ്ജി ട്രോഫി ക്രിക്കറ്റില്‍ ദല്‍ഹിക്ക് ഫോളോ ഓണ്‍. ജലജ് സക്‌സേനയുടെ മാന്ത്രിക സ്പിന്നില്‍ വട്ടംകറങ്ങി വീണ ദല്‍ഹി ഒന്നാം ഇന്നിങ്‌സില്‍ 383 റണ്‍സിന്റെ കൂറ്റന്‍ ലീഡ് വഴങ്ങി. കേരളത്തിന്റെ ഒന്നാം ഇന്നിങ്‌സ് സ്‌കോറായ 9ന് 525നെതിരെ ദല്‍ഹി ഒന്നാം ഇന്നിങ്‌സില്‍ വെറും 142 റണ്‍സിന് പുറത്തായി. 63 റണ്‍സിന് ആറ് വിക്കറ്റുകള്‍ പിഴുത ജലജ് സക്‌സേനയാണ് ദല്‍ഹിയെ തകര്‍ത്തത്. ഫസ്റ്റ് ക്ലാസ് ക്രിക്കറ്റിലെ 18-ാം അഞ്ചാം വിക്കറ്റ് നേട്ടമാണ് സക്‌സേന സ്വന്തമാക്കിയത്. സിജോമോന്‍ ജോസഫ് രണ്ടും സന്ദീപ് വാര്യര്‍, മോനിഷ്എന്നിവര്‍ ഓരോ വിക്കറ്റുകളും വീഴ്‌ത്തി. തുടര്‍ന്ന് രണ്ടാം ഇന്നിങ്‌സ് ആരംഭിച്ച ദല്‍ഹി മൂന്നാം ദിവസത്തെ കളിനിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ 142 റണ്‍സ് എന്ന നിലയിലാണ്. അര്‍ധസെഞ്ചുറി നേടിയ ഓപ്പണര്‍ കുനാല്‍ ചന്ദേല (51), ക്യാപ്റ്റന്‍ ധ്രുവ് ഷോറെ (രണ്ട്) എന്നിവരാണ് ക്രീസില്‍. ഒരു ദിവസത്തെ കളിയും ഒന്‍പതു വിക്കറ്റും ബാക്കിനില്‍ക്കെ ഇന്നിങ്‌സ് തോല്‍വി ഒഴിവാക്കാന്‍ ദല്‍ഹിക്ക് ഇനിയും 241 റണ്‍സ് കൂടി വേണം. ഏകദിന ശൈലിയില്‍ ബാറ്റ് ചെയ്ത് അര്‍ധസെഞ്ചുറി നേടിയ ഓപ്പണര്‍ അനൂജ് റാവത്താണ് പുറത്തായത്. 103 പന്തില്‍ 10 ഫോറും മൂന്നു സിക്‌സും സഹിതം 87 റണ്‍സെടുത്ത റാവത്തിനെ, കേരള ക്യാപ്റ്റന്‍ സച്ചിന്‍ ബേബിയാണ് പുറത്താക്കിയത്. ഒന്നാം വിക്കറ്റില്‍ റാവത്ത്-ചന്ദേല സഖ്യം 130 റണ്‍സ് കൂട്ടിച്ചേര്‍ത്തു.
രണ്ട് വിക്കറ്റിന് 23 റണ്‍സ് എന്ന നിലയില്‍ ഇന്നലെ ഒന്നാം ഇന്നിങ്‌സ് പുനരാരംഭിച്ച ദല്‍ഹിയെ സക്‌സേനയുടെ നേതൃത്വത്തില്‍ എറിഞ്ഞിടുകയായിരുന്നു. 66 പന്തില്‍ മൂന്നു ഫോറുകള്‍ സഹിതം 25 റണ്‍സെടുത്ത നിതീഷ് റാണ, 42 പന്തില്‍ മൂന്നു ഫോറുകള്‍ സഹിതം 25 റണ്‍സെടുത്ത നവ്ദീപ് സെയ്‌നി എന്നിവരാണ് ദല്‍ഹിയുടെ ടോപ് സ്‌കോറര്‍മാര്‍.
മൂന്നാം ദിനം ആദ്യ സെഷനില്‍ വര്‍ധിത വീര്യത്തോടെ പന്തെറിഞ്ഞ കേരള ബോളര്‍മാര്‍ക്കു മുന്നില്‍ ക്യാപ്റ്റന്‍ ധ്രുവ് ഷോറെയും നിതീഷ് റാണെയും ചേര്‍ന്ന് ഏറെനേരം പിടിച്ചുനിന്നത് ദല്‍ഹി മത്സരത്തിലേക്കു തിരിച്ചുവരുമെന്ന് തോന്നിപ്പിച്ചു. എന്നാല്‍ സ്‌കോര്‍ 59-ല്‍ നില്‍ക്കെ ധ്രുവ് ഷോറെയെ ജലജ് സക്‌സേന പുറത്താക്കിയത് മത്സരത്തിന്റെ ഗതി തിരിച്ചു.
72 പന്തില്‍ മൂന്നു ഫോറുകള്‍ സഹിതം 19 റണ്‍സെടുത്ത ഷോറെയെ റോബിന്‍ ഉത്തപ്പ ക്യാച്ചെടുത്തു മടക്കി. പിന്നീട് കൃത്യമായ ഇടവേളകളില്‍ വിക്കറ്റ് വീഴ്‌ത്തിയതോടെ ദല്‍ഹി തകര്‍ന്നടിയുകയായിരുന്നു.
